စစ်ကိုင်းတိုင်း ဟုမ္မလင်းမြို့နယ်မှ လွှစင်ကုန်းစခန်းသိမ်းတိုက်ပွဲတွင် စစ်ကောင်စီတပ်နှင့် ရှမ်းနီတပ် (SNA) ပူးပေါင်းတပ်မှ ဗိုလ်ကြီးအပါအဝင် ၂၀ ဦးထက်မနည်းသေဆုံးပြီး ပြည်သူ့ကာကွယ်ရေးရဲဘော်တစ်ဦး ကျဆုံးခဲ့ကြောင်း သတင်းရရှိသည်။ မုံရွာ – ဟုမ္မလင်း ပြည်တောင်စုလမ်းပိုင်းပေါ်တွင် စစ်ကောင်စီအခိုင်အမာတပ်စွဲထားသည့် လွှစင်ကုန်းစခန်းကို ခန္တီခရိုင် တပ်ရင်း(၁)မှ ဦးဆောင်ပြီး နိုဝင်ဘာ ၂ရက်တွင် စတင်တိုက်ခိုက်ခဲ့သည်။ နိုဝင်ဘာလ ၄ ရက်တွင် တိုက်ခိုက်သိမ်းပိုက်နိုင်ခဲ့ပြီး ယနေ့( နိုဝင်ဘာ ၈ရက်)အထိ ထိန်းချုပ်ထားသည်ဟု ပြည်သူ့ကာကွယ်ရေး ရဲဘော်တစ်ဦးက ပြောသည်။
“အဲဒီစခန်းမှာက စစ်ကောင်စီနဲ့ SNA (ရှမ်းနီတပ်ဖွဲ့) ထိုင်ထားတာ။ ဘန်ကာ ကို အခိုင်အမာဆောက်ထားလို့ တော်တော်လေးတိုက်ယူရတယ်။ သူတို့ဘက်က ၂၀ မကဘူးသေတယ်။ ဆေးရုံကို ပို့တာတွေလည်း ရှိတယ်” ဟု ၎င်းက ပြောသည်။ သေဆုံးသူများအနက် ဗိုလ်ကြီးအပါအဝင် ငါးဦးကို စစ်တပ်ကုန်း၌ မြေမြှုပ်သဂြိုလ်လိုက်ပြီး ၁၅ ဦးထက်မနည်းကို ဥရုမြစ်အတွင်းသို့ နောင်ပိုအောင်တံတားပေါ်မှ ပစ်ချမျောလိုက်ကြောင်း ဒေသခံများက ပြောသည်။
“ရာထူးအကြီးတွေကို သေချာမြေမြှုပ်ပေးတယ်။ အငယ်တွေကို နောင်ပိုအောင် တံတားကနေ ပစ်ချလိုက်တာဟုတ်တယ်။ သေဆုံးသတင်းကို လိမ်ချင်လို့ အလောင်းဖျောက်တဲ့ သဘောလို့ ထင်တယ်”ဟု ဒေသခံတစ်ဦးက ပြောသည်။ တိုက်ပွဲအတွင်း ပြည်သူ့ကာကွယ်ရေးရဲဘော်တစ်ဦး ကျဆုံးခဲ့ရကြောင်းလည်း သတင်းရရှိသည်။ လက်ရှိတွင် လွှစင်ကုန်းစခန်းကို ပြည်သူ့ကာကွယ်ရေးတပ်ဖွဲ့များက ထိန်းချုပ်ထားပြီး ဆတ်ကရားစခန်းကို ဆက်လက်တိုက်ခိုက်နေသည်။ တိုက်ပွဲကို ခန္တီးခရိုင်း တပ်ရင်း(၁)၊ HPDF -124၊ HPDF မိုးကြိုးအဖွဲ့၊ CDM ရဲများဖြင့် ဖွဲ့စည်းထားသော ပြည်သူ့လုံခြုံရေးအဖွဲ့တို့က တိုက်ခိုက်နေကြောင်း သိရသည်။
ဒေသတွင်း စစ်ရေးတင်းမာနေ၍ နောင်ပိုအောင် – လွှစင်ကုန်း – အောင်ပင်လမ်းပိုင်း၊ နောင်ပိုအောင် – အထက်အော်သော် – ခုံတန်း လမ်းပိုင်းများကို လတ်တလောကာလ၌ လုံးဝအသုံးမပြုကြရန် HPDF -124က သတိပေးထားသည်။ ထို့အပြင် နောင်ပိုအောင်တိုက်နယ်အတွင်းရှိ လွှစင်ကုန်းကျေးရွာတွင် တိုက်ပွဲများဆက်လက် ပြင်းထန်လျက်ရှိသောကြောင့် ပြည်သူများ စစ်ရေးသတိအမြဲရှိကြရန်နှင့် တားမြစ်ချက်များကို တိတိကျကျ လိုက်နာပေးကြရန် အသိပေးထားသည်။
Hits: 0