Chin State, Matupi township sungah phualsat ahi Chinland Council (CC) khut nuai a om Chinland Defense Force-Matupi (CDF-Matupi) Brigade 2, pawl pan makaipi (Commander) mi 2 leh galkap nautang 6, vekpi gawm mi 8 te pen CDF- Matupi Brigade 1, te kiangah lut ta cih thu CDF-Matupi Brigade 1 te’n January 8, 2025 ni-in pulakkhia uh hi.
Matupi township ah CDF- Matupi min pua (Brigade)nih om uh a, Brigade 1, te ICNCC / Chin Brotherhood (CB) tawh galkap vai, gam thu vai ah kipawl a, Brigade 2 te pen Chinland Council (CC) tawh galkap vai, gam thu vai ah kipawl uh hi.
Hih CDF- Matupi kipawlna 2 te pawl khatah kipawlkhop theihna ding a lunggulh Brigade 2 pan Makaipi (commander) 2 te leh galkap nautang 6 tengin abeisa 2024 November leh December kha sungin Brigade 1, te kiangah lutin kigawm uh a, Brigade 1 pawlin zong amau thukhunte tawh kizui-in, lungdam takin sanna nei uh ci hi.
Hih vai tawh kisai in, ” amaute’ minsaziante bel kigenkhia thei nailo hiphot. Mi nih kithuah in hong lut omin, khat kia hong lut zong om” ci-in CDF-Matupi Brigade 1, pan thunei Salai Baw Uk in gen hi. A thu kicingzaw leh kitheician nailo ci hi.
Brigade 1, te’ thusuahna a bawlna sungah 2025 March 31, ni a nunung penin sapna / zolna lai pulakkhia uh a, Matupi Kilamthakna (Reconstruction of Matupi) cih min tawh Matupi Revolution thau tawi kipawlna khempeuh in a manlang thei penin hanciam ciat in kipawlkhopna ding tangkona nei uh ci hi.
Hih vai tawh kisai Brigade 1, pan Salai Bawi Uk in a genna ah,” Ko, lam pan hun ciangtan om loin muak den ung. A lang khat lam pan Matupi Kilamthakna (Reconstruction of Matupi) om loin, mai lamah khat leh khat kinawngkai toto lai leng Matupi township pen Mipite’ nuntakna le khantohna ding vai tampi kizekai tuam mahmah ding hi. Matupi Kilamthakna (Reconstruction of Matupi) vai a manlang in mapankhop ding deihna tawh kizol/ kisam cih himai” ci-in genkhia hi.
Ukna buluh (SAC) thuneihna a beina mun Matupi Township ah adang Thautawi khat leh khat kikal buaina kideih nawnlo a, CDF- Matupi Thautawi kipawlna min khat bek adeihte khempeuh Brigade 1, in khutzak in lungdam tak kimuakden hi ci-in genbeh hi.
Matupi khuapi pen Arakan Army (AA) akipan belpawl pih tuamtuamte leh Chin Brotherhood (CB) te’n a beisa 2024 June 29, ni-in lakhia / ukcip zo ta uh a, tu-in khuapi lamkikna (Reconstruction) nasep, galkap lam (defense), Kimakaihna lam (administration), cidamna lam (health), Pil sinna lam (education) leh mihing cimawh huhna lam (humanitarian assistance) cihte amau mun ciatah kihanciam san laitak ahihna thute pulak hi.
Hits: 4