ASEAN kipawlna ahi ASEAN Parliamentarians for Human Rights (APHR) pawlin Kawlgam ah Federal Democracy gam thak a dinkhiat zawhna dinga mapang / nasem kipawlna ahi; Standing Committee for Establishment of Federal Democratic Union (SCEFDU) tawh ma kipangkhawm suak lai ding hi, ci-in June 1, 2026 ni-akibawl a (10) veina Pyidaungsu Hluttaw ah lai khak puak uh hi.
Tua a lai khakna sungah Ukna buluh (SAC) pawlte’ gam makaih zia pen Kawlgam thukhun tawh kituaklo bek tham loin, gam makai ding dinmun vaipuak nei dingin kituak hetlo uh cih thu ASEAN gam leh gam tuamtuam tungah theihsakna leh hanthotna zong kiciantak gelh beh uh hi.
Ukna buluh (SAC) galkapte in Kawlgam bup mipite bawlsia in, zawh thawh thu tawh gam ukcip bek tham loin, thumanlo kiteelna leh tua kiteelna pan a kahto in, a galkap puan suah khiat ziau tawh leitung gam tuamtuamte’ uptheih, santheih dingin a hanciamna uh pen maizum huai mahmah ahihna APHR in a lunghimawhna thu pulakna nei hi.
Tua banah SAC te in galhiam muanna leh galkap puan (Army Uniform) laihna tawh gam kimakaihna pen thuman leh thudik hilo ahih manin, Kawlgam in Democrecy lampi ah kikhelna om peuh mahlo ahihna thu nasiatak mawh sakna nei uh hi. APHR in a genna ah, “SAC te’ gam makaihzia pen a galkap puan suahkhia in, tualsung mipi puan a silh hiziau bek a, gam-ukna leh kimakaihna kikhel kicithei peuhmah lo hi. Tua bek tham loin, ASEAN sung leh leitung gam tuamtuam ah thuman loin gamtang / nasem nuam uh ahih manin, hih ukna buluh (SAC)te’ kalsuanzia leh dinmun pen nasiatak langpan semsem ding kisampha mahmah lai hi ” ci-in khauh tak tangkona nei hi.
ASEAN Parliamentarians for Human Rights (APHR) in mipi thuneihna bulphuh Federal ki-ukna “Standing Committee for Establishment of Federal Democratic Union (SCEF)” kiphuh khiat zong mipi hamphat nading kalkhat suanna ahi hi. Tangkona sungah abeisa 2020 kiteelpina-ah teelcingte ahi Committee Representing Pyidaungsu Hluttaw (CRPH), National Unity Government (NUG), Mualmi thautawi kipawlnate (EROs) leh mipi civil kipawlna khempeuh tawh khauhtak mapang khawm suak ding hi ung, ci-in kiciamna nei hi.
Kawlgam buppi ah SAC te’ gamtatna hangin mi tampi gal tai-in nek leh dawn, omna khawlna ki sam bek loin, mihing tampi in sihlawh, beilawh uh hi. Mihing nuntakna pen bang mah tawh teh theih loin manpha mahmah hi. Inter-Parliamentary Union-IPU in abeisa 2020 kiteelpi tungtang ah telcingte bek mah thuman / thudik panmun ngah / mipite’ teel thuneihna neite ahihna zong nong theihpih, pomsak manun kilungdam mahmah hi, cih thute zong kihel hi.
Hits: 2