Sen (China) kumpite’ tawsawnna / sawlna tungtawn in, Kokan minam Thau tawi (MNDAA) pawlin Ukna buluh (SAC) tawh gamvai tawh kisai Sabuai tungah kikupna nei khawmin, kilemna / kitelsiamna bawlin, kido /kikap nawnloh dingin MNDAA te’n December 3, 2024 ni-in thusuahna nei uh hi.
Kokan Galkap (MNDAA)te’n Kawlgam bup minam khempeuh kipawlkhopna (Union of Myanmar) sung pan paikhia in, gam thak sat ding ahih lohna leh amau leh amau suaktatak ki-uk/ kivaipuakna (Self administration / Autonomous Area) deihna tawh MAL /SAC a do/ akap ahihna tangko khia uh hi.
SAC in Kawlgam sung State and Division khempeuh ah lei lam leh vanlam pan galdona hangin, mipite nuntakna suplawh tampi om khin ta ahih manin, hih bang galdona leh ngongtatna pan a manlang theithei in, a khawlna ding MNDAA te’n ngetna nei hi. Lam khat leuleu panin SAC in hih a galdona leh ngongtatna uh pan a khawl phial zongin, MNDAA in amau leh amau gam huam sungah gal kidalna ding tawh kisai akisam bangin vaipuak la den ding cih zong pulakna nei uh hi.
Nung kha November nipikal 2 sungin, Kokang (MNDAA) makaipipa pen China kumpi in man / kem cip cih thuthang kigenna tawh kisai in, kimanlo / kikemlo hi cih thu China gamdang lam vaisaipa in pulakkhia khin hi. Shan State ah 1027 Operation kici galdona ah Lasio khuapi leh Shan state sung Khuapi 9 teng MNDAA ten lakhia zo / ukcip zo uh hi. Lasio Khuapi panin MNDAA te atai khiat / a nusiatna dingin SAC in Sen (China) te kiangah huhna ngenin SAC makaipipa Min Aung Hlaing mimal ngiatin China gamah zinkhia hi.
Hits: 5