Tanintharyi Divison, Dawei township, Banchaung kuam Kyaukhtu khuaneu ah phualsat SAC gal phual lakna-ah SAC galkap 15 si-in 8 kihingmat banah galvan tampi ngah khia uh ci-in KNLA Commander Saw Mue Gay in genkhia hi. Kyuakhtu galphual pen January 23 nitak lam (3:00pm) in KNLA pawlin busim uh a, a zingciang January 24 nitak lam (2:30pm) hunin lakhiazo ahihna uh Commander Saw Mue Gay in gen hi.
Hih Kyauktu galphual lakna pen Tanintharyi Division sung ading Revolutionary pawlin a masapen galphual lakkhiatna hi-in, Karen National Union (KNU), Karen National Liberation Army (KNLA) Brigade 6 battalion 27 leh Brigade 4 battalion 12 leh Dawei District PDF T1 Column, T5 Column leh Pa-kah-pha pan Duangmin Column kipawl khawmin a lakkhiat uh cih thu Southern Military Region Military Sub-division No. 3 te’n pulak hi.
“SAC galkap pawl tampi si-in, tua sungah numei khat kihel 9 hingmat thei ung. Thaupi thau neu honkhat zong kingah. Ko lam pan bel aliam om kei ung” ci-in Saw Mue Gay in genbeh hi. A kihingmatte’ sungah Kha-hla-yah 273 pan Bo Kyaw Htet Aung akihel adang 8 hi uh a, KNU thukhun om bangin thu kibawl ding ci hi. Kyaukhtu gal phualpi pen Yephyu khuapi huam Kanpauk huam ading Kha-hla-ya 273 battalion te’ phual satna lian khat ahi hi.
“Hih kikapna pen Tanintharyi Division ading a masa pen hi in, galphual lakna leh khuapi lakna cihte zong zomto suak ding hi ung” ci-in Southern Military Region Military Sub-division No. 3 Deputy Regional Commander Comrade Jupiter in genkhia hi. Tua banah hih galphual pan MA namte thau lawng 14, RPG lawng 1, 60MM Commando lawng 2 leh thau nam tuamtuam lawng 20 akipan thauvui, thautang tampi kingah khia ci-in Southern Region Sub-division in pulak hi.
Hits: 5