Karen State, Kokrate, khuapi sungah abeisa October 27, 2023 ni zingsang (05:00am) hun akipan nitak lam dong KNU /KNLA kipawl khawmte leh ukna buluh (SAC) galkapte nasiatak kikap uh a, tuni October 28, zingsang in zong Kyun Doe Township pan Kokrate township lam a om SAC khut nuai gamgi cing Border Guard Force (BGF)te galkap Mawtaw 21 dimin agalkap kipuakbehte tuang uh cih thu mit tawh a mu ngiat khuamite khatin genkhia hi. Hih kikapna ah SAC galkapte’ Thaupi tang hangin Thada Oo, Kya En Gone, No. 7 veng sung a om mipite 2 si-in, 2 a liam banah naupang kum 9 khat zong nasiatak liam cih kiza hi.
“Zanni kikapna ah Thau ging ziahziah ahih manin, ko zong lau in inn leh saite khak in tawmvei om phot hi ung. Tuni zingsang teh Thauging hong dai zawdeuh ahih manin, khua sungah Saite (Store) leh innte kinung khak in, Khuamite pawl khat mualtung Sanginn lamah galtai in kipaikhia ziahziah ta hi. Ka U nu in atate 3 Mawlamyaing lamah puak khin ta ” ci-in Kokrat khuapi sung a vanzuakna sai (Store) nei khuami nupi khatin gen hi. Kikapna sungah SAC te zum, Palik zumte meikang in kinak siat mahmah cih thu Tualsung mipite’ tung pan kizasawn hi.
Tulaitak Kokrate khuapi dinmun tawh kisai in, ” tusun 1:00 pm akipan kikapna thauging kiza lai hi. Kei zong ka tate damloh teng tawh ka lungsim, ka hehsuak hi. Mi tampi galtai uh in, kei zong taikhia ding kithawi thawi ta ing” ci-in, khuami nupi khatin genbeh hi. Zanni kikapna tawh kisai bel Kokrate khuapi, Chaung Sone phungzi sang huang sung a om SAC galkap 70 valte pen PDF pawlin busim in kikapna om a, SAC galkap 1 si-in cih thu Kya Phyu PDF battaion 4 pan pulakkhia uh hi.
Hits: 15