Northern Shan State sungah regional command headquarters (Dah Kah Sah – Lauk Kai) buppi Galvan khia in, Rakhine State, Kyauktaw township, Taung Shi Taung Strategic Camp buppi SAC galkap 200 kimte’n Galvan nusia in Arakan Army (AA) tungah kipumpiak uh cih thu AA in pulakkhia hi.
Tua banah SAC Camp a dangte panin zong Galvan nusia ding (or) Mipite ang lumah lut ding kizopna ngah ta cih thu genkhia uh hi. Taung Shi Taung Strategic Camp kikapna sungah AA te’ kipawlpih galkapte zong galkap zia sinna kawmin, galdona ah kihel uh ci hi. Ahi zongin kua pawlte cih genkhiatna nei lo ci hi.
Paletwa area buppi pen SAC galphual om nawnlo / bei siangna mun leh gam ahi dingin Rakhine Armyte’n SAC Campte khempeuh nuai zan mang uh cih zong genkhia hi. January 7, 2024 ni akipan Paletwa Area, nitumna lam teng a om SAC Camp khempeuh busim in, kilakhiazo ta cih pulak hi.
A om lai SAC Camp pawl khat pen tukal sungin lakhia / busim siang ta ding uh cih kiza hi. Chin Letwa Camp lakkhiatna / kikapna pan a taikhia SAC galkap vekpi 104 te pen India gam sungah lut uh a, Assam Rifile Army te’n kem uh hi. 2023 December 29, ni zongin Point (377) Camp pan SAC galkap 151 te India gamah galtai in lut uh hi. Tua a taimang SAC galkape pen India kumpi in January 2, 2024 ni-in SAC khut ah puak uh hi.
Myauk U Township Tin Chit Taw Camp pen Janaury 7, 2024 nitak lam (4:00pm) hunin Rakhine galkap (AA) te in busim in lakhia uh a, galvan a lompi leh Thau vui, thautang tampi ngah khia uh ci-in pulakna nei hi. Tua banah SAC galkapte leh Camp tamtuamte in galvan nusia in, mipite’ angsung ah a lut nuamte hun ciangtan omlo in, AA tungah kizomthei den cih AA pawlin zaksakna nei hi.
![](https://tongsan.org/wp-content/uploads/2024/01/415955605_708414424690686_5317100602695031102_n-2-2-1024x636.jpg)
![](https://tongsan.org/wp-content/uploads/2024/01/415955241_708414528024009_3023507093131413840_n-2-2-1024x774.jpg)
![](https://tongsan.org/wp-content/uploads/2024/01/416030671_707581974773931_659364400940617775_n-2-1-1024x699.jpg)
![](https://tongsan.org/wp-content/uploads/2024/01/417116441_708414428024019_4260419798857442960_n-2-1024x703.jpg)
Hits: 1