Chin State, Matupi Township sungah tulaitak kitelkhialhna hangin amau leh amau sung kikaptuahna vai a manlang thei pen akilemna om theihna ding CDF – Matupi Fundraising Committee in nakpitak hanciamna a neihna thu Tangkona nei uh hi.
CDF- Matupi Brigade (1)te pen Chin Brotherhood Alliance ah kipawl uh a, CDF- Matupi Brigade (2)te ahih leh Chinland Council tawh kipawl uh hi. Abeisa Jun 18, 2024 ni akipan hih CDF- Matupi Brigade 1, 2 te kikal kikapna kipan uh a, langnih a si aliam om tuak uh hi.
Tulaitak Matupi khuapi lakna tawh kisai CDF- Matupi Brigade 1, leh Brigade 2, banah amau tawh kipawlpihte kikal ah kitelkhialhna hangin, kikapna om a, liamna leh sihna ciang dong piang ahih manin, CDF – Matupi Fundraising Committee pan lunghimawhna leh dahna thu pulakkhia uh hi.
Matu mipite khempeuh kilemna ding deihna tawh hih kikapna tawh kisai-in, Matupi Thau tawi ahi CDF- Matupi Brigade (1), leh (2) pan makaite Sabuai phungah tukhawm in, a manlang thei penin kilemna a bawlna ding uh CDF- Matupi Fundraising Committee pan nakpitak hanthawn uh ci hi.
Gamsung gampua a om Matu mipite’ lam panin zong Matu mipibup thukhat / khaukhat in paikhop theihna ding, minam sungah kimuhdahna leh kilangpanna a piang sak thubulpite akipan kampau mukpau khialhnate kidawmin, kimaisakna ding cihte Thusuahna ah kihel hi.
CDF- Matupi Fundraising Committee pen gamdang a om Matu Khangnote kipawlkhawm in, Spring Revolution galdona ah galmainawk ahi CDF- Matupite’ ading Fundraising zonsakna tawh amau hihtheih zahzah in, panpihna ding ngimna tawh abeisa August 26, 2022 ni-in, a phuhkhiat uh kipawlna ahi hi.
CDF- Matupi Fundraising Committee pen Matupi mipibup kipumkhatna ding bulphuh hi-in, akipancil akipan tuni ciang kum 2, sungah kingah Fund te pen Matupi galkap khempeuh ading ngimna ahih bang mahin, CDF-Matupi General Headquarters ah puak pahpah uh cih Committee zasak uh ci hi.
![](https://tongsan.org/wp-content/uploads/2024/06/448733309_804127775119350_8203441883601236373_n-2-768x1024.jpg)
![](https://tongsan.org/wp-content/uploads/2024/06/448968689_984343340361386_4477358859163497215_n-2-2-1024x575.jpg)
Hits: 3