Mandalay Division, Mogok khuapi ah November 11, 2024 nitak in SAC te’n galvanleng tawh bomb khia uh a, tualsung mi pasal 16 leh numei 4, vekpi gawm 20 si uh a, aliam abai 13 val bang om ci in TNLA te’n kipsakna nei uh hi. Mogok khuapi nisuahna lam Hle Oo veng leh nistumna lam Lutha veng tengah SAC in nasiatak boom va khia uh, ci in TNLA thugenpi U Lwin Zyi Oo in gen hi.
Mogok khuapi pen TNLA leh PDF te kipawl in abeisa June 25, 2024 ni-in SAC tawh kido kipan uh a, July 24, 2024 ni in SAC te omna khempeuh buluak khin bek tham loin, tua hun akipan Mogok khuapi pen TNLA te in ukcip in kalsuan zia ding khempeuh vaipuak lakhin uh hi. Tua banah Mogok khuami galtaite zong khuapi sung zuan kik khin in, lung muang takin a om hithiat laitak un, hih bangin lamet loh laitak SAC te’n thakhat thu-in, bomb akhiat gawp uh ahih manin, mipite lunghimawh mahmah uh ci hi.
SAC makai Min Aung Hlaing pen November 10, 2024 ni-in China gam a zinna pan Kawlgam a ciah kikni zingciang in SAC ten hih bangin Mogok khuapi nasiatak bomb a khiat uh ahici-in, TNLA thuneite’n kipsakna nei uh hi. Mogok khuapi a kapna hangin misi, a liam abai banah inn 10 val kisiacip a, a kapkik khak ding mipite kipatau mahmah ci-in TNLA makaiten gen uh hi.
Hits: 1