Abeisa January 15, 2024 ni a Manipur police Commando te’n Mawhna neilo pi-in, a mat uh Kuki Makai 2 te ahi; Mualsang khua Hausapa Pu Hemkholal Mate leh Moreh Youth Club, President Philip Khongsai te amanlangin a khahkhiatna ding lunggulhna tawh Kuki Innpi Tengnoupal, Kuki Students Organisation leh Kuki Women Union Tengnoupal cihte akipan Kuki kipawlna tuamtuam pan makaite kipawlin January 16, 2024 ni-in India leh Myanmar gamgi Moreh khuapi, Tengnoupal Bazar ah tutsa lungphona (sit-in protest) nei uh cih kiza hi.
Tua banah 2024 January 15 ni Moreh khuapi ADC Building maiah Lungphona nei Numeite pen Meitei Police Commando ngongtat pawlin umcip in, thuman lopi mahin Nemneihhing Samte kici numei khat Thau tawh kapin nasiatak liamna ngah ci hi.
Kuki Innpi Tengnoupal in Moreh leh Tengnoupak District sung a om Meitei galkapte akipan Administration District Committee leh District Chief Police te’ tungah ngetna a neih hangun, awlmawhlo / thusimlo uh bek tham loin, Manipur galkapte leh Police kicite khempeuh Moreh khuapi ah mipite bawlsia in, buaina leh lauhuaina a piangsakte suak uh cih kiza hi.
Thau / galhiam tawilopi a mawhsakna tawh a mat uh tualsung makai 2 te ciangtan omlo (24 hours) sungin a khahkhiat kei uh leh Tengnoupal District pan Administrator pa, Meitei Police Commando te’ tungah mipite’ hehna sosang semsem dinga, buaina lianpi tawh kizomto ding cih kiza hi.
Hih Numei kipawlnate in KLP Assam Rifile battalion Camp mai ah zan thapai Tutsa Lungphona (Sit in Protest) nei uh ci hi. Moreh khuapi dinmun pen tuni January 17, 2024 ni zingsang (05:10am) hun akipan Kinawktuahna kipan a, tunitak lam ciang dong nasia mahmah lai ci hi. Ahi zongin thupiangte kiciantak kitheibeh nailo cih khuamiten gen uh hi.
Hits: 4