Rakhine State, Myauk U khuapi, Thammarat Veng sung a om Public Hospital pen December 10, 2025 zankim (9:13PM) hunin Ukna buluh (SAC/SAM) te’n kikapna / kidona omlo pi-in, mipite ngimna tawh Jet fighter 1 zangin, Pound 500 tha, a khauh mahmah namte 2 khiat uh hi. Tua a bomb khiatna ah Hospital huang sung a om Zato Innpi tawh kizom Operation Hall, Guh leh tang lam Hall, Special Operation Hall, leh Siavuan nasemte’ omna Innte akipan Myauk U Zatopi khempeuh vut leh vai suak banah akim apam a Inn pawl khat dong kisiacip cih kiza hi.
Hih Myauk U hospital bomb khiatna hangin Zato lum cinate , kha 3 pha pan numeino 1akihel pasal 16, numei 17, akigawm vekpi 33 zato inn phual ah simang uh hi. Adang zato lum cina dangte ahi; naupaii nupite, pitek putekte leh naupangno akipan mawhna nei hetlo mipi 76 te zong nasiatak liam ci hi. Tua a liamte lakah Arakan zato nasem pawl khat zong kihel cih kiza hi. Myauk U Hospital bomb khiatna tungtang ah mawhna lian pen nei ahi Vaihawmpi leh ngongtat nasem vanleng hawlte khempeuh nasiatak phu kila hamtang ding hi ci-in, Arakan Army (AA) in December 11, 2025 ni-in, thusuahna nei uh hi.
Myauk U district sung a om Myauk U Hospital pen Arakan region sung a teng minam, biakna deidan omlo in, zato lum cinate khempeuh in a belh a zuatna Zatopi khat ci hi. Tua bang kawmkal ah Ukna buluh (SAM) leh Arakan Army (AA) te kum tampi lai akipan tuni ciang dong kikap/ kidona nasiatak kizomto bek tham loin, gamveng tuamtuam pan galtai / cimawh mipite’ huhna ding akipia zatui-zatangte leh annek tuidawnte SAM te’n lutsak lo (khakcip) sak laitak uh hi. Tua banah Rakhins state pen gal kidona hang mahin, mundang pan annek tuidawn, zatui zaha cihte kilei theilo, hun haksa akiphut khak hun laitak cih kiza hi.
Tua bangin gentheih haksatna kawmkal pan biakna, minam deidan omlo in Zato lam kibawl, kikepna phualpi ahi Myauk U Hospital pen lungsim gitlohna tawh vanlam pan mulkim hetlo in bomb akhiat Ukna buluh (SAM)te gamtatna pen Arakan region sungah a nasia penpen ngongtatna ahi hi. Hih bangin mawh neilo numei naupang akipan a lom atang a mipi sihna leh liamna ahi hi ci-in, Arakan Army (AA) in pulakna nei hi.
Arakan National League/ Rakhine Army in ahih leh Myanmar gamah tulaitak apiang gam sung galkidona leh gamvai kituahlohna / buainate pen Thauvui thautang tawh ahilo gam thu le la (thudam) tawh kilemna bawl theih dingin upna nei uh hi. Ahi zongin gamvai thubulte tawh kilemna / kikupna a om theilo dinmun pan lampi dang khat nuai ah pelh theihloh kidona a om hangin, leitungbup in galvai thukhun tawh kizui-in, mipite a sukha / a buaisak nasepnate pen a tawm thei penin, kipelh den hi ci-in, Arakan Army (AA) te’n gen uh hi.
Tua banah galkidona sungah zuih ding galvai tawh kisai Thukhunte pen galkapte’n kizui ahihna leh gal leh gal kikaptuahna ah galte’ zia leh tong cihte gen zong kullo in, mipite’ omna leh tenna khuapi leh khuaneu a om Zatopite pen kap zanin, mipite a lom atang a sihna Vanleng bomb khiatna cihte pen leitung mipil, mihau, misiam leh thukhual gamte ah kuakua in kisang zolo, gamtat zia ahihna thute AA te’n a thusuahna ah genbeh uh hi.
” Hih bangin mipi neihsa Zato Inn, Zatui zuakna Innte, kivel ki-etna zato neute ah zato lum mipite mulkim hetlo in a gamta / khut khial SAM te pen thuman leh thukhun om bangin, thubawlna neih ding leh thuman adeih mimal, kipawlna tuamtuamte tawh kipawlin ngongtat (SAM)te’ tungah nasiatak thuhkikna / phu lakna pello kinei ding hi” ci-in Arakan Army (AA) in a thusuahna uh ah gen uh hi.
Arakan region akihel Myanmar gam sung mun khempeuh ah mawhna neilo mipite nisim in, mulkim hetlo takin a bawlsia, a that ziahziah Ukna buluh (SAM)te’ gamtatna leh mihing a mulkim hetlohnate pen leitung gam khempeuh in khutzep in hong en mawk loin, hong huh/ hong dalpihna dingin, mai ngapna takpi tawh AA in huhngetna zong nei uh hi.
Hih bang a SAM te’ ngongtatna hangin sihna, liamna leh supna a thuak mipite in thuman / hehpihna a ngahna ding leh gamtat sia / ngongtat SAM te tungah leitung thukhun om bangin, thubawlna a neihna dingin, misi, miliamte leh haksatna thuak mipite’ tangin, Arakan Army (AA) in leitung bup kipawlnate leh gamveng tuamtuamte’ tungah huhna leh panpihna nget sak uh cih kiza hi.
Abeisa 2023 November 13- 2025 November 13 kikal kum 2 sungah Ukna buluh (SAM)te’ ngongtatna hangin, Arakan Army (AA)te’ mun leh phual ahi lo, mipite’ tenna mun leh mualte ah mipite ngimna ngiat tawh Vanleng bomb khiatna akipan mihing bawlsiatnate hangin, mawhna neilo mipi 1152 sikhin in, 2153 liam uh a, Thuman lopi a kiman vekpi 1034 bang pha ta hi.
2025 kum January 3 – November 28 kikal ciang kumkhat dektak sungah (SAM)te in Sittwe, Pauktaw, Yathedaung, Ponnagyun, Kyaukdaw, Minbya, Mauk-U, Ann, Taung Koh, Rambe, Kyaukphyu, Gwe Township and Paletwa (Chin State) sung tengah mihing bawlsiatna, ngongtatna, galvai thukhun tawh kituaklo Vanleng bomb khiatnate hangin, mipi a liam vekpi 502, a si vekpi 192, inn leh lo kisia vekpi 596, cihteng supna om cih pulakna nei uh hi.
Hits: 0