Shan State (Northern), Namkham khuapi a om Ukna buluh (SAC) Commander busa in a makaihna galphual (Camp) khempeuh busim in, kilakhia siangzo hi ci-in, Ta’ang galkap (TNLA) in tuni December 19, 2023 nitak lamin pulakkhia uh a, Khuapi bup zong ki-ukcipzo ta ci hi.
Namkham Township sung a om SAC galphualte pen abeisa November 19, ni akipan busim uh a, December 19, 2023 zingsang tung (01: 30am) hunin lakhiazo uh hi. Kikap zawh kha khat sungin Namkham galphual thak, Kankaw Camp, 12 Miles, 13 Miles, Microwave Camp, Pansy Camp, Takwet Camp, Hei Yai Camp, Mai Weit Camp, Thengkan Camp, Manpoh Camp, Man Weng Camp, Police Station leh SAC zum tuamtuamte a vekpi in lakhiazo cih thu pulakna nei uh hi.
Namkham khuapi SAC galphual ah galkap 900 kim om uh a, (Sah Kah Khah-7) leh a ukna nuai ah Khah Lah Yah – 261, Khah Mah Yah -246, 245 leh Dah Kah Sah cihte pan galdo khawm dingin phualsat khawm uh cih kiza hi. Namkham galphual thak kidona hun sungin SAC pawl Major rank akihel misi luang tampi leh akihingmat 3 om cih pulakkhia uh hi.
Kidona sung ah SAC teæ galvan thauvui thautangte, Thaupi akipan, Thau nam tuamtuam, Landmine, Thautang namkim leh galvan a ngahte uh Photo zaih in, Online Social Media tungah khahkhia zihziah uh hi. Namkham khuapi galphual thak lakkhiat zawhna ding khakhat sung hanciamna leh galdona tungtang ah TNLA galkapte 49 si-in, 145 in liamna ngah uh a, mipi 13 in sihlawh uh cih pulakkhia uh hi.
Namkham khuapi a om SAC galphualte akikap sungin SAC lam pawlin Vanlam pan Jet Fighter tawh 260 vei, Y8 Vanleng tawh 35 vei, Y 12 vanleng tawh 40 vei leh galvanleng Mi35 tawh 25 vei kap ziahziah uh hi. Tua bangin a kapna-ah a khauhpai / a thahat mahmah Pound 500 bomb tawh 12 vei leh Chemical gas Bomb tang 6 zangin kap ziahziah cih thu zong pulak uh hi.
Tua banah Namkham Township Man Camp pan 105 / 120 Howitzer weapons thaupi tawh 195 vei leh Namphatka Camp pan 105 / 122 / 155 Howitzer weapon Thaupi tawh 300 vei val kap ngekngek uh ci hi. Van lam, Thaupi tawh a kap banah SAC galkap lam pan ATR – 42/72 Vanleng tawh Thau leh thautang cihte akipan annek tuidawnte 15 vei Camp thak ah huhna puakin khiat ziahziah banah December 12 ni-in zong Gal huh galkap 100 kimte Galkap puakna Mi 17 tawh 3 vei puak ngekngek uh cih pulak hi.
SAC Namkham galphual pen Ta’ang galkap (PSLF / TNLA te’n a do hun sung khempeuh SAC in mipite ngimin, a kapna hangin Namkham Township sunga khuami naupang 3 leh adang 13 si uh a, 43 in liamna ngah uh cih pulak hi. Christian biakinn te, biakinn kisilna tuikuangpi (Swimming Poll), Zato leh mipi tenna inn 70 kim Thaupi leh Vanleng tawh bomb khiatna hangin kisiacip in, mipite tenna inn 24 kangtum cih kiza hi. TNLA in 1027 Operation galdona sungah Namkham leh Namsan khuapite a vekpi-in lakhiazo in ukcip zota uh hi.
![](https://tongsan.org/wp-content/uploads/2023/12/410952274_697304619135000_3921294321234983356_n-1024x768.jpg)
![](https://tongsan.org/wp-content/uploads/2023/12/410964009_697304542468341_4919602670290115481_n-1024x768.jpg)
![](https://tongsan.org/wp-content/uploads/2023/12/410973185_697304925801636_9140670903089724255_n-1024x613.jpg)
![](https://tongsan.org/wp-content/uploads/2023/12/410846094_697256592473136_8548632776580820993_n.jpg)
Hits: 3