Chin State leitaw lam Matupi Township a om SAC te’ phualsatna khat ahi Thaiboi Camp pen Chin Defense Joint Force pawlte ahi: CDF-Matupi, CDF- Mindat, Lautu leh CNDF teng kipawlin ni 2 sung a busim khit tuni December 19, 2023 ni zingsang (11:00am) hunin Camp buppi lakhiazo uh cih kiza hi. Abeisa November kha sungin zong Matupi Tsp., sung mah ah a om Lailenpi khuapi leh Rihzua khuapite pen Chin Defense Joint Force kipawl khawmte mahin lakhia khinin, tuni dong a ukcipzo suak uh cih kiza hi.
Hih Thaiboi Camp ah SAC galkap 50 val om uh a, Camp a buluh ma un Galvan khia-in kipumpiak (Surrender) dingin sawl uh himah leh SAC galkapte in, ” Na ngap uh leh hong lut un! Lan kang (White Flag) bel ngahlo ding, Thautang bel ngah thei kha nu teh” ci-in dawng uh cih thu CDF-Matupi pan thunei khatin gen hi. Camp nong luh uh leh akim a om khuaneute haltum mang ding ci-in tawnbawl lai uh ci-in genbeh hi. Camp pan a taimang SAC galkapte pen CDF Pawlin nasiatak zonsan laitak uh ahih manin, a si aliam leh hingmat cihte sazian kiciantak kisuahkhia thei nailo cih thu CDF- Matupi pan thuneipi kiza hi.
” Thaiboi khua pen Matupi leh Paletwa gamgi kikal a om hi-in Matupi, Kanpalet, Paletwa, Mindat kikal tengah vanpuakna tawh kisai haksatna tampi om hi. Tua banah Thaiboi Camp a om manin, SAC khah Lah Yah-304 pan galsimna nei den uh a, Matupi – Paletwa lampi tunga om khuaten galtual tuak den uh “ ci-in Thaiboi Camp a thupitna tawh kisai CDF-Matupi thunei khatin genbeh hi.
Thaiboih Camp akibusim khit ciangin SAC pawlin nitak lam nai (2:30pm) hun pawlin Thaiboi khualui leh Vankai khuate Vanleng tawh Bomb khiat uh a, Daw La Khup (Kum 53), U Cang Sai (Kum 55), U Lawng Cawng (Kum 58), U Lian Lawr (Kum 78) ten sihlawh uh a, (U Rui Hlung in liamna ngahin zato kipuak cih kiza hi. Nitak lam (3:00pm) hun pawlin zong Laysin khuaneu Khualui leh Sanginn bomb khiat leuleu uh a, Sanginn kisiagawp cih kiza hi.
Abeisa Nov. 15, 2023 ni-in zong Matupi Township, Walu khua Sanginn khat pen SAC in galvanleng tawh bomb khiatna hangin sangnaupang kum 15 nuaisiah vive 8, CDM sangsia 1, leh khuami 2 in sihlawh uh hi. SAC langpang Thautawi mipi galkapte’ khauhpai mahmahna Chin State sungah SAC galphual Rihkhawdar, Lailenpi, Rihzua cihte abeisa Nov, kha sungin CDF, PDF ten lakhia in ukcipzo ta uh hi. Tuni ciangciang Chin State ah Khuapi 7 te zong ki ukcipkhin ta ci-in CNF thugenpi Salai Hteet Nyi in gen hi.
Shan State (Northern) sungah Three Brotherhood Alliance pawl zong 1027 Operation galdona nasia semsem in, Sagaing Division, Chin State, Kayah (Karenni) State akipan Kawlgam mun tuamtuam kizelin, SAC galphual vekpi 200 val leh Khuapi 12 val SAC pawlin khahsuah ta uh hi.
Hits: 11