Paletwa khuapi ah SAC galkap a bei siang na dingin Arakan Army (AA) in do kei leh Chin State buppi suakta vetlo ding hi, ci-in Chin Brotherhood (CB) thugenpi Salai Yaw Mang in gen hi . Chin State sung a om Cindwe, Matupi, Kanpalet, Mindat, Falam khuapite CB in lakhin uh a, a om lai Khuapite zong akilakzawhna ding a kihanciam laitak ahi hi.
CB thugenpi Salai Yaw Mang in a genna-ah, “Paletwa khuapi a om SAC gal phualte pen AA in a dolo hi zenzen leh Chin State sungah Thau tawi kipawlnate pan kua mahin kido zolo / kilakhia zolo ding hi. AA in Paletwa-ah SAC a beisak lo hi leh Matupi khuapi suakta vetlo ding a, Cindwe khuapi zong suakta vetlo ding hi. Kanpalet khuapi leh Mindat khuapi zong suakta ke’n teh! Tua banah Lailenpi dung teng a suakta om vetlo ding hi. Amau(SAC) a tultul asim pen gal huh ding 200, 300 sam ziau le uh ko’ ading hamsa mahmah ding hi. Tua manin Chin State pen a suahtak zawhna ding om thei vet lo hi,” ci-in gen hi.
Paletwa khuapi pen AA in a lakkhiat zawh manin CB in khuapi dangte do-in akilazo bek ahihna Salai Yaw Mang in gen beh hi. Chin Brotherhood in Arakhan Army (AA)’ huhna banah amau ‘ hanciamna tawh Cindwey, Matupi, Kanpalet, Mindat, Falam cihte akilazo bek ahi hi. Paletwa-ah SAC beina dingin CB a thupit mah bangin Rakhine suahtakna dingin zong AA a thupi ahihna Salai Yaw Mang in gen hi.
“Paletwa pen AA kihutna mun hi -in, AA ading in Confederate sang a niam zawlo cih ahi zongin Independent ahi zongin kicithei hi. AA’ ading a thupi pen ah mipi kepbitna leh mipi phattuamna lam ahi hi. Paletwa khuapi pen SAC in luahzo hi zenzen leh Rakhine gam bup ading suahtakna om loin kikembit zolo ding himawk hi. Rakhine lutna ding Magwe-Ann, Pagu-Taunggoh leh Ayeawaddy-Gua cihte a kikepbit zawh hangin, Paletwa-ah SAC om kik zenzen leh bangmah kicihthei nawn lo ding hi. Paletwa pan SAC galkap 500 hong kahtoh leh Taunggoh, Ann lam pan 5,000 hong pai tawh a kibang phial ahi hi. Arakhan bitna dingin AA in Paletwa kembit ahi hi,” ci-in gen hi.
CB in Chin State-ah SAC tawh kido-in a huh ding a om loh laitak, a tawpna-ah AA in huh ahih manin tha lawp mahmah uh hi. Paletwa tawh kisai khuasung mite’ lunggulhna thupi ci-in CB pan Salai Yaw Mang in gen hi. AA in gensiat thuak liangin Paletwa a kembit hi a, nidang ciangin Paletwa tawh kisai sabuai maiah kikup dingin CB in gen hi. Paletwa zong Chin State mah ahihna CB makaite in June 18, 2025 ni-in Thuthak genkhopna ah pulak uh hi.
Hits: 1