Shan State, Naungcho township Tanbo khuaneu a om SAC galphual pen Mandalay PDF leh belpawlpih Ta’ang galkap (TNLA) kipawlte January 3, 2024 ni zingsang (07:30am) hunin busim in lakhiazo bek tham loin, galmai nawk makaipi Lieutenant Colonel Thet Aung pen galmat in kihingmat cih thu Mandalay PDF in pulak uh hi.
” SAC lamte in Tanbo galphual a ngah kik zawhna ding uh nasiatak in do uh hi. Ahi zongin ko, lam pan amau’ galhuh a kuante khaktanzo dinmun hiphot ung” ci-in MDY-PDF thugenpi Ko Osmon in genkhia hi. Tanbo khuaneu ah galhuh a kuan SAC Mawtaw 3 te January 3 nitak lam (2:00pm) hun pawlin kap uh a, SAC galkapte a si aliam om banah galvan tampi lakkhiazo cih kiza hi.
” SAC lam pan a si aliam tam mahmah uh, a luang kilakhia zong om, a taimang a suakta zong pawl khat omin, a kihingmat zong om uh. Galmai nawk makaipi Lieutenant Colonel Thet Aung pen kihingmat cih zong om” ci-in genkhia hi. A kihingmat Lieutenant Colonel Thet Aung pen galmat thukhun tawh kituakin kikem ding ci hi. Tanbo khuaneu SAC galphual pan Drone Jammer thaupite akipan Thauvui thautang tampi kingahkhia cih kiza hi.
” Hih lam a om khuaneute bel galkikap cil lai pekin taimang uh a, khua sungah kuamah om nawnlo. Khuahun omzia hoih nawnlo akitheih akipan a taikhia mang uh hipah” ci-in Naung Cho khuami khatin gen hi. Tanbo khuaneu kidona ah MDY -PDF leh Kipawlpih galkapte zong akipumpiak honkhat om uh ci-in MDY-PDF in pulakkhia hi. Tanbo khua a om SAC galphual pen MDY-PDF leh kipawlpih Ta’ang galkap (TNLA) te in January 2, ni-akipan busim uh ahi hi.
Hits: 4