Myanmar gam a om Mualmi Thau tawite’ sungah a thahat pen ahi UWSA galkapte in abeisa “1027 Operation” kipatkhit zawh amasa pen tuni January 5, 2024 ni-in, galdona kipankhia bek tham loin, Northern Alliance te tawh Myanmar – China gamgi a om Hopan khuapi busim in lakhiazo uh hi.
Hopan khuapi pen abeisa 2008 Constitution tawh kizui-in, “O”- Wa Self-Administered Division ii khuapi hi a, SAC ukna nuai ah kihel hi. Hopan pen Kokang galkap (MNDAA) ukna ahi Kunlong khuapi ii nisuahna lam Tai 11 gamlatna leh Chin Shwe Haw khuapi ii nitumna lam Tai 9 kigamlatna ah om hi.
Hopan khuapi sung a om Police Station leh SAC Campte pen tuni January 5, 2023 ni zingsang in Kokang galkap (MNDAA) te’n busim in lakkhia uh bek tham loin, UWSA “O” galkapte zong khuapi sungah lutin luahcip zo cih kiza hi. Hopan khuapi sung a om Police station, Township Administration Office leh SAC galkap Khah Lah Zah (154) te pen MNDAA leh akipawlpih galkapte’ kiangah tuni January 5, zingsang tung (05:00am) hunin Galvante nusia in, kipumpiak (surrender) uh cih kiza hi.
Social Media ah akithehzak Video file ah UWSA “O” galkapte’n amau Dialkhai (Flag) khai uh a, galvan tawi SAC galkapte a pua galkap Mawtawte Hopan khuapi sungah a lut ziahziah kimu hi. Hopan khuapi sungah UWSA galkapte a lut laitak in Kokang galkap (MNDAA) pawlin lampi nawl tuakah bitna lam (security) asepna Video File te kimuthei hi. Hopan kikapna ah kipawlpih (Alliance)te tawh dokhawm uh cih thu Bumar Peoples Liberation Army (BPLA) in pulakkhia hi.
Khuapi sung dinmun tawh kisai bel akiciantak genkhiat theihna om lo hi. Hopan khuapi kikapna tawh kisai MNDAA leh UWSA thugenpite’ tungah kikansan laitak ahi hi. United Wa State Army (UWSA) te pen tuhun a minthang Galvan hoihte mah a zang dimdem galkap mimal vekpi 30000 val nei uh cih galkap lam thukankhiatna nei pawlin ummawh uh hi. Hih UWSA pawlin ” 1027 Operation” kipat akipan koi lam, koi lamah panpihlo ” Kaingawi loin, a laizang ah omcipna ” zia leh tong zang den ding ahihna uh pulakkhia uh hi.
Hits: 2