August 14, 2023 || Tongsan Media Group ||
Shan State leilu lam a om Lashio township ah Ta-ang National Liberation Army (TNLA)te leh Ukna buluh (SAC) galkapte kikapna kizomto lai cih TNLA ten August 13, 2023 nitak lamin gen uh hi. Lashio township Namlong khuaneu kiangah August 9-10, 2023 ninih sung langnih kikaptuahna om a, August 11 ni-in zong Holauh khua kiangah kikap leuleu cih kiza hi.
August 11 nitak lam akipan TNLA te’n ukna buluh (SAC) te’ galphual pen buluh in va kap uh a, SACte’ khut nuai a om Sah Kah Khah (16), Khah Hlah Yah-68, Yah Mah Khah /Khah Hla Yah- 17 galkap vekpi 60 kimte tawh kikapna khauhpai semsem cih kiza hi. TNLA galkapte Brigade (6),te’ galphual a om Holauh khua kiang kikapna ah ukna buluh (SAC) te’ lam pan galhuh tampi behlap uh cih thu kiza hi.
Tulaitak gal kikapna dinmun tawh kisai in TNLA thuthak phualpi pan vaisaite akidot hangin thukizakna kician om theilo phot hi. Lashio township kikapna sungah ukna buluh (SAC)te a si aliam tampi om himah leh TNLA te’ pulakna kician lianin kitheizo nailo ci hi. Tua banah August 13 ni kikapna tungtang ah a si aliam om/ omlo cih sazian kician nailo cih kiza hi.
TNLA leh SAC galkapte in abeisa July leh August kha sung bekbek in, kikapna vekpi gawm 12 veival nei uh ci hi. Lashio, Mese, Kutkai leh Kyautme township sung tengah kikapna nasia pha diak a, kikapna pawl khat ah SACten kap masa in, mun pawl khatte ah TNLA ten kap masa uh hi.
Source: People’s Spring
Translated: Tongsan Admin Team
Hits: 7