Shan State (Northern), Kut Kai Township, Namphatka ah Bomb khia a leng SAC Jet Fighter khat tuni January 16, 2024 ni zingsang lamin kapkhia ung ci-in, Kachin Independence Army (KIA)te’n tunitak lamin genkhia uh hi. Kut Kai khuapi pan Tai 30 gamlatna Nanphatka khuaneu a om SAC Infantry battalion (Khah Lah Yah), No. 123 Camp pen KIA in zanni January 15, ni-in busim in lakhia uh a, tua kimah KIA leh SACte nasiatak kikap uh hi.
Tuni zingsang dong tatsat loin nasiatak kikap uh a, SAC Jet Fighter khatin bomb khiat laitak kikapkhia hi ci-in, KIA thugenpi Colonel Nawbo in gen hi. ” Bangci danin kap a, koici danin kia cih kiciantak kigenthei nailo hi. Kapkhia cih bel kiza khin hi. Jet Fighter vanleng cih zong gen hi” ci hi. Akician in genkhiatna leh kipsakna om thei nailo ahih mah bangin, SAC lam pan zong genkhiatna bang mah nei thei nailo uh hi.
Kachin Independent Army (KIA) phualpi omna Kachin State, Laiza khuapi kiangah zong abeisa January 3, 2024 zingsang lamin Helicopter khat kapkhiatsak cih thu Colonel Nawbu in gen khia hi. Tua hunin zong SAC lamte’n genkhiatna neilo uh hi.
KIA in abeisa 2021 February kha in mipi Kumpi thuneihna a sutkhia SAC te khauhtak do in, adang mipi galkap (PDFs) te a panpih Mualmi Thau tawi kipawlna khat ahi uh hi. Kachin State tawh kizom Sagaing Division leilu lam zongah KIA in adang Revolutionary te tawh mapang khawmin SAC nasiatak do ngiat ngiat uh hi.
SAC in zong KIA phualpi omna Laiza khuapi a buluah theihna ding leilam leh vanlam pan nasiatak hanciam den uh a, tuni dong gualzo ngeilo uh hi. Tua bang kawmkal ah SAC in Van lam pan a gamla kapna Thaupite zangin Kachin mipite tampi liamna leh sihna pia uh hi.
Ukna buluh kipatcil lam 2021 May 1 ni pek akipan Kachin State, Moe Mauk township, Myothit leh Kone Law kikal ah Galvanleng khat KIA in kapkhiatsak hi. Tua bangin akikapkhiatsakna hangin Vanleng lam galkap Ulian 3 in sihlawh uh cih thu May 7, ni-in Kumpi thuthak genkhiatna hunah SAC thugenpi in pulakhia in kipsak hi.
2023 November kha sungin zong Karenni Region (Kayah State), Fruso township sungah SAC neihsa Jet Fighter khat kikapkhiat sakin, vanleng hawl (Pilot Major) pen Revolutionary pawlin man uh hi. Tua banah 2023 July kha sungin zong Karenni Region, Bolakhe Township ah galvanleng khat mah Tualsung PDF te’n kapkhia uh hi.
Ukna buluh khit kum 3 kim sungah SAC te tawh kikap / kidona gambuppi ah khauhpai semsem hi. Langpang pawl (Revolutionary)in Shan State (Northern), Sagaing Division, Chin State, Rakhin State, Karenni Regiom (Kayah State), Karen State a om SAC Campte, Police station mun 100 lom a sim kibusim in kilakhia ziahziah banah gamgi sumlei sumzuakna Station leh Khuapi pawl khat zong kilakhia / ukcipzo ta hi.
Hits: 6