Chin State, Tedim Township, Tai Ngen khua ah phualsat a om SAC galkapte’ Camp pen Chin Revolutionary bel pawlte’n tuni January 16, 2024 zingsang (04:00am) akipan uh a, (07:30am) hunin lakhiazo uh a, SAC galkapte luang 30 val si-in, Galvan zong tampi kingah khia ci-in, CDF – Siyin Civic Defense Militia (CDM-Siyin) pan Chief Commander U Thawngpu in genkhia hi.

Hih Tai Ngen Camp pen Chin State leitaw lam leh leilu lam kizopna, Kalaymyo – Falam leh Kalaymyo – Tedim mawtaw lamka bom, Lampi kizopna hi-in, SAC pawlte’ Camp mun 3 ah om hi. Tua Camp teng khempeuh pen abeisa January 12, ni akipan busim uh a, ninga cinni tuni January 16, zingsang (04:00am -07:30am) sungin Camp buppi sutkhiazo ngaw ngaw ta cih thu U Thawngpu in genbeh hi.

Taingen khua SAC Camp lakna ah Chin National Army – CNA pan Lt. Col. makai in, CDM Siyin, CDF-Thantlang, CDF Hakha, CDF -KKG, TCDF – Tahan, CDF-Hualngoram, CDF-Zangiatram, leh PDA cih teng kipawl khawm uh ci-in CDM- Siyin pan Chief Commander in gen hi. SAC galkap lamte Captain Nyain Win kici akihel 30 val si hi. Tua banah (60MM) hand of diamond, RPG (G-4) lawng 1, (MA-2) lawng 3, (MA-3) lawng 5, (MA-1) lawng 7, akipan Thauvui thautang tampi kingah ci-in, CDM-Siyin Chief Commander U Thawngpu in gen hi.

Kikapna ah a silo sun SAC galkap 2 Kalaymyo lamah tai suak uh ahih manin nung delh in kaplumzo uh ci hi. Taingen Camp lakna ni 5 sungin SAC pawlin Vanleng tawh nisim in kap ngekngek banah Kalay University huang pan Thaupi zong tawh kap ziahziah cih thu kikapna ah kihel Mipi galkapte in gen uh hi. Hih Taingen Camp kikapna ah Chin Defense Force pawlte CNA galkap 9 si uh a, 40 kim liam cih kiza hi.

Tua banah SAC galkap lamte’ vanleng leh Thaupi tawh kapnate hangin Thaingen, Hiangzing, Theizang, Mualpi khuate akipan khuamite galtai in bumang cih thu gal mainawk galkap khatin gen hi. Taingen khua pen Kalaymyo tawh Tai 30 kigamla in, Kalaymyo – Falam, Kalaymyo – Tedim lam lianpite akituahna Lamka bom hi-in, SAC pawlte Chin State sungah a kilehsuk, kilehtohna lam zikpi ahi hi.

Abeisa 2023 November 26 ni-in CDF CDM Siyin pawlin khatvei, 2023 December 7, ni-in CDF-CDM-Siyin, PDF Kalay, PDF Zoland, RKDF leh CNDF kipawlin khatvei, 2023 December 15 ni-in CDF CDM-Siyin, PDF Kalay, PDF Zoland leh CNDF kipawlin khatvei dokhawm ngei khin uh ci hi. A thumvei khitteh 2 vei sim kik leuleu uh a, tutung a 4 veina ah Camp buppi lakhiazo ngaw ngaw uh ahihna U Thawngpu in genkhia hi.

Chin State sungah Chin Revolutionary galkapte in Taingen khua kiangah kizopna mun thupi khat ahi Thuamvum (Canedy) SAC Camp leh Hakha Township sungah Surkhua, Falam Township ah Rih Khuadar leh Webulah, Mindat Township ah Makuiimnu, Matupi Township ah Lailenpi, Thantlang Township ah Naring khuapi cih teng lakhiazo ta uh hi.

Hits: 4

Byadmin

Leave a Reply

Your email address will not be published. Required fields are marked *