Syria gamah galkap thuneihna a kisuhkhiat khit phetin Kumpi langpang pawlte’ makaipi Abu Mohammed Al-Golani leh former Prime Minsiter Mohammed Al-Ghazi Jalali te in thuneihna tawh kisai mipite’ khutah paikhiatna ding (transfer of power) vai December 10, 2024 (monday) ni-in kikupna nei uh hi. Kuakua Kumpi sem ding khat peuhpeuh tungah Syria mipite’ deihna bangin Thuneihna piakkhiat ding (transfer of power) a baihsa in om hi ung ci-in Prime Minister Mohammed al- Ghazi Jalali in pulakkhia hi.
Syria gam mipite lungkimna leh bitna a piazo Thuneihna kipiakkhiatna ding vai tawh kisai in, limtak kikupna kinei hi cih thu Kumpi langpang pawlte’n Social Media tungah genkhia ziahziah uh hi. Syria nitumna lam a om kumpi langpangte ii hotkhiatna kumpi makaipa Mohammed Bashir zong tua Thukikupna ah akihelna Video tomno ah kimukhia thei hi. Syria gam Idlib District leh akim teng a om Kumpi langpang pawl ahi Hayat Tahrir Al- Sham (HTS) kici pawlin thuneihna leh ukna vaipuak laphot uh hi.
Syria galkap kumpipa ahi Bashar Assad ii galkap ukna a bei khit Government Cabinet Minister pawl khatin thuneihna leh vaihawmna nei suaksuak lai phot uh cih thu tulaitak a Prime Minister Mohammed Al-Ghazi Jalali in genkhia hi. Ahi zongin Government thuneihna sung nasepnate bel akikhawlcip khinta ahihna Syria gam tawh kisai UN Humaniterian Department ah thuneipi (UN Humanitarian Coordinator for Syria) ahi Adam Abdelmoula in genkhia hi.
Hits: 0