Chin State, Tedim khuapi ah abeisa khakhat lai a, Ukna buluh (SAC) galkapte leh mipi galkapte kikapna hangin, Tedim khuabup mipite a galtaina pan un, tukal sungin khuami pawl khat Inn ciahkik thei ta cih kiza hi. “Sakollam veng lamah bel a ngeina mah bangin mipite vaksuk vakto bek tham loin, Vanzuakna / sumbuk (Market) te zong kihongkik ta ci hi. Zingsang tung lamsiau pawl khat zong om kiukiu ta sam ” ci-in Tedim khuami khatin gen hi.
Abeisa galkidona hangin Myoma Veng; Lawibual veng leh mun pawl khat ah Thaupi khakna hangin Inn pawl khat kangtum ahih manin, khuamite a ciah kikna ding Inn neilo banah Tui pipe te leh tuibemte kisiamang ahih manin, bawlsan laitak uh ci-in, khuamite’n gen hi.
Abeisa May 27, 2024 ni Tedim khuapi ah SAC galkapte leh mipi galkapte kidona hangin, Ukna buluh (SAC) te in Tedim khuapi sungah Inn 60 val haltum uh a, PDF Zoland te’n zong SAC te’ Camp mun 2 busim in lakhiazo bek tham loin galvan hon khat zong ngah uh hi.
![](https://tongsan.org/wp-content/uploads/2024/06/449181003_811368474427654_5777830354328363666_n-2-1024x461.jpg)
![](https://tongsan.org/wp-content/uploads/2024/06/449028285_811368527760982_3988946395223676762_n-3-1024x461.jpg)
![](https://tongsan.org/wp-content/uploads/2024/06/441904762_1075268620791980_10426172751840171_n-1-1024x563.jpg)
Hits: 4