Thailand galkapte in Myanmar gammi khat a thahna tawh kisai thuman leh thukician manlang thei penin a kankhiatna ding ngetna laite Thai thukhen zumpi (Lawyer Council of Thailand) in Kumpi thuneite’ tungah puak toh ding uh ci hi. Thailand thusitna lam (Lawyer Council) Chairman in “Civil law or Criminal law ” lam khat teitei tawh thubawl ding pulakna zong nei khin uh ci hi.
Myanmar gammi Aung Ko Ko (Kum 37) pen Thailand galkapte’n a thahlup zawh ni 400 pha khin himah ta leh bang hangin that lum uh cih kankhiatna leh thukhenna om nailo hi. Tua ahih manin manlang takin thuman muhkhiatna ding leh a thatte tungah thuman tawh thukhen ding kilam en hi ci-in, Fortify Rights a nasem CEO Director Mathew Smith in genkhia hi.
Abeisa 2024 January 12 ni zingsang (11:00am) hunin Thailand gam Maesok District, Tak provine sung Rai 70 kiang a Check Gate ah Thailand galkap 4 te’n manin, a thudotna uh panin Singkhuah tawh satlum kha uh ahihna kitheikhia ci hi. Apumpi tung khempeuh sidup khinin liamna tawh a sih lawh ahihna zong kithei hi. Misipa Aung Ko Ko pen Thailand gam Maesok khua ah teng hi-in, Nattut natna (Malaria) vei, in Myanmar gam lam Myawadi khuapi ah Zato kilak in akilehkik lamah Thailand galkapte in Check Gate pan samin thusitna nei uh ci hi.
Aung Ko Ko in Thailand khuasung kem pawlte (Village Security Volunteer)te’ puan tungsilh namte ahi (Chor Ror Bor) silh ahih manin, tua hang a Thailand galkapte’n a man uh ci hi. Abeisa September 27, 2024 ni-in zong Thailand thukhen zum (Thai Court) in Myanmar gammi Social Service Volunteer khat ahi U Shiyar Chyat pen kum 3 leh khali sung thong khum ding thukhen uh hi. Amah zong Aung Ko Ko mah bangin, Chor Ror Bor group ah nasem ngei khat hi a, Aung Ko Ko sihna vai ah kihel dingin ummawh uh ci hi. Thai galkapte’ mi thahna thu thuman kankhiat mengmeng ding leh a thatte tungah thubawl mengmeng dingin Thailand kumpi thuneite’ tungah Fortify Rights te in ngetna nei uh cih kiza hi.
Hits: 1