Leitung gam tuamtuam ah gumpa Jesuh suah lungdam bawl hunte nuamtak akizat khit ciangin, Kumthak 2025 hunte zong innkuan, pawlpi leh kipawlna min tuamtuam tawh a munmun ah nuamtak kibawl ciat hi. Zomi Revolutionary Army (Eastern Command) te’n zong Cikha khuapi a om Bethel Camp ah Kumthak muakna / dawnna thupitak bawl thei cih kiza hi.
Tua lai ah Zomi Development Committee Internation (ZDCI) pan makai pawl khat kihelthei uh a, kumthak hun bawlna thupisak tuam mahmah ci hi. Athupi mahmah khatah ZRA (EC)te’ ading neihloh a phamawh vanzat pawl khat Zomi Women Power pan piakkhiatna nei uh ci hi. Tua huhnate hangin maban ngimna tupna leh mapankhopna ah kipumkhatna leh thahatna khangsak mahmah ding ahihna gen uh hi. Tua hi a, tukum pen khantoh kum, lawhcin kum leh gualzawh kum hi ding cih a lametna leh upnate pulakkhia ci hi.
Zomi Women Power pan akipiakhia vante Pu Pau Lun Min Thang (ZDCI) tungtawn in ZRA (EC) thuneite’ tungah piakkhiatna nei ci hi. Tua banah Zomi State Interim Administrative Council in 2025 kum sung kisaipih/ kizoppih kipawlnate tawh kikupkhopnate limtak puahpha in, maban zoptoh suak ding cih thu Pu Kham Min Thang (Chairman of ZPCC) in pulakna nei ci hi.
Abeisa 2024 kum sungin ZPCC in adang kipawlna ahi Federal Member States and Unit cihte tawh a kizopna a dawldawl ahi; Political, Military, Administrative cihte geelna leh sepkhopna kinei khin a, mualmi kipawlna tuamtuamte leh gamdang pan kipawlna tuamtuam tawh kizopna cihte kinei thei ahih manin, gamdang lam pan mipite’ thapiaknate hoih lam manawh cih thu Pu Kham Min Thangin genbeh hi.
Abeisa kum 60 val sung galkapte’n khausau tawh ukcipna (Centralized red tape system) nuai ah omzia, ngah theihna lampi om bangbang tawh kinungta/ khuasa i hihna dinmun pan tuni in ei le ei hanciamna tawh suaktatak ki-uk / kimakaih theihna ding kihanciam ahi hi. Tua bang i hanciamna ah baih hetlo himah leh hih Galkap ukcipna i bulotkhiat zawh ding mah thupi mahmah ahihna Pu Kham Min Thang in genbeh cih kiza hi.
Hits: 12