Ukna buluh (SAC)te dona/ kapna tawh kisai Kawlgam buppi ah khauhpai semsem a, Kawl minamte’ mun le gam ahi Irrawaddy Region sung dong Mipi galkap (PDF)te ahonhon in lutzo ta uh hi. Hih mipi galkapte in Irrawaddy Region galkap (Local- PDF) cih min tawh galkap standard thak khat phutkhia uh a, galkapzia thusinna zong abeisa June 3, 2025 ni-in mahialna nei thei uh cih kiza hi.
Irrawaddy Local PDF, Training No. (1) galkapzia sinna pen Magwe Region sung gamlak mun khatah kibawl hi-in, tulaitak Irrawaddy Region sung a omsa mual minam Thau tawi pawl (EROs) te tawh kipawlin, Irrawaddy Region sungah a sawt loin lut ding uh ci hi.
” Chin State leh Magwe Region kikal gamlak mun khatah galkapzia sinna kineithei suak hi. Battalion khat tang akicin ciangin Irrawaddy Region ah kilut dinga, a omsa Thau tawi (ERO)te tawh galdona kipanpah ding himai hi. Mai kha ciangin galkap lutthakte galsinna (Traning) kipankik ding maban kinei leuleu hi” ci-in Irrawaddy Local PDF pan vaisaipi Sai Wai Lin in genkhia hi.
Hih Magwe Region a galkapzia sinna sang tuah pawi ah galkap vekpi 89 pha in, mai July kha sungah Irrawaddy Local PDF Traning No 2, maban kizomto pah ding uh ci hi. Irwwaddy Region sungah galdo ding cih ahih manin, Irrwaddy Local PDF min kiphuak hi-in, a sawt loin Irrawaddy Region sung a om mipi galkap (ERO)te leh (PDF)te tawh khut kilenin SAC te kihawlkhia ding hi cih thu Irrawaddy Local PDF vaisaipi tung pan kizasawn hi.
” Irrawaddy Region ading bek ahihna tawh thulu khat bek akipia suak hi. Ministry Department te zong tawh kizopna om hi. Tawlkhat khit ciangin Ministry Department nuai ah lutkik ding geelna zong kinei hi. Irrawaddy Region a om mipi galkapte zong tawh a sawt loin mapankhop loh phamawh ding hi” ci-in Irrawaddy Local PDF vaisaipi Sai Wai Lin in gen hi.
Tua banah Irrwaddy Local PDF galkapte pen tulaitak innteek mipite’ kisapnate seppihna kinei a, Irrwaddy Region sung akitun ciangin galvan, a vuii atang kisamte zong huh ding ci hi. ” Ko, Irrawaddy Region sung a om PDF kipawlna tuamtuam teng pen abeisa hun akipan pumkhat sakhat in mapang khawm khinsa ka hi uh hi. Irrwaddy Region sung ka pai nopna uh a hang om hi” ci-in Irrawaddy Local PDF makaipi Sai Wai Lin in genbeh hi.
Hits: 4