Chin State, Tedim Township, Saizang khua ah abeisa April 9, 2025 ni zankim (11:30pm) hunin Ukna buluh (SAC)te’n bomb thahatna pound- 500, gik namte a khiatna hangin, Pa Pau Sian Khamte innkuan mimal 6 in mulkim huai takin sihlawh uh hi. A tapa khat bel zato kipuak suak pahin Pasian hehpihna tawh tuni dong dam suak ci hi. Amau Innkuan vekpi 8 pha uh a, Kawlpi ah sang kah a tapa khat bek suakta ci hi. A Inn uh zong zancip dikdek in, singtawng khat zong akizang thei ding om nawnlo ci hi.
Tua bomb kiatna / Innkuan mi 6 a site’ inn tawh pi (40′) bek kigamlatna a om Full Gospel Assembly pawlpi mi Pa Thang Suan Nial te’ inn zong bomb kiatna hang mahin, nasiatak zancip dikdek in, zattheih ding sing mal khat zong om nawnlo ci hi. Ahi zongin amau Innkuan a si, a liam khat zong om hetlo uh ahih manin, a lamdang takin Pasian kep ngiat hi ding ci-in, Rev. Kham Suan Hang (Pastor of FGA Saizang) in genkhia hi.
Hih Saizang khua a bomb kiatna mun leitang pi 20 kim thuk sukin, tua mun pan leivui leh suangtumte kithehkek/ lengkhiato ahih manin, a kiat kikna leh a bat khakna Inn khempeuh nasiatak kisiamang ci hi. Mi pawl khatte’ genna ah tua Bomb pen khauhpai lua mahmah ahih manin, pound 500 bek hi lo dinga, pound 1000 kim hi hamtang ding ci uh hi.
Hih Saizang khua bomb khakna hangin a kizancip Full Gospel Assembly (FGA) pawlpi mi Pa Thang Suan Nial te’ Inn lamna dingin, FGA Founder and Senior Pastor in ” Dr. Mungtawng Foundation – FGA ” min tawh huhna / panpihna sum MMK. 5,000,000 piakhia cih thu Rev. Kham Suan Hang (Pastor of FGA Saizang) tungtawn in kizasawn hi.
Hits: 10