Chin State, Hakha township, Vanha khuano ah Ukna buluh (SAC)ten October 13, 2025 (10:30am) hunin Sanginn bomb khiat uh a, sangnaupang Salai Johan, leh Mai Zing Cer) te si-in, honkhat in liamna ngah uh cih khuamite’ tungtawn in kizasawn hi.
Vanha khuami khatin a genna ah, ” Naute aw,,, sanginn sungah lungnuam tak lai na sin laitak Ukna buluhte’ hangin, note na nuntakna uh bei lawh zen lawmlawm maw! Na kiang uh a khuanu khaupate om kim mah hiveng ung, hong honkhia zo kei zen ung ei maw” ci-in ama Social Media tungah gelhkhia hi.
Sangnaupang Salai Johan ahih leh sanginn sung mahah hong nusia pah a, Mai Zing Cer bel sipah lo himah leh a liamma nasia lua ahih manin, Kei bel si taktak ning ci-in a gen kawmkawm mahin, thum ngekngek kawmsa in hong nusia ci-in genbeh lai hi.
Havan khua pen Hakha khuapi pan Tai 20 bek kigamla hi a, SAC langpang/ a do (PDF)te zong a om lohna khua khat ci hi. SACte’n bomb khiatna hangin Vanha khua Sanginn kisicip dikdek bek tham loin, teenna inn tampi mah kisiazan cih kiza hi.
Abeisa October 8, 2025 nitak (7:00pm) kim pawlin zong Chin State, Mindat township sung a om Wantuh khuaneu leh Then Chaung khua a om Sanginnte zong Ukna buluh (SAC)ten bomb khiat khin uh a, sangnaupang pasal 3 leh pumpi hatlo numei 1 si-in, 20 val liam uh cih kiza hi.
Hits: 5