Chin State, Hakha khuai Myoma Police Station pen tuni October 16, 2025 ni zingsang (03:00am) hunin Chinland Council (CC) ukna nuai a om CDF-Hakha makai in, CNAte tawh buluh in nasiatak kikapna om a, Ukna buluh (SAC) galkapte 6 si-in, 15 liam uh a, CDF-Hakha lam pan zong 1 si ci hi. Galvan zong honpi khat mah kingah ci hi. Tua banah Thongkia mimal 15 kihonkhiazo a, tuate’ sungah CNF pan 2, CDF-Hakha galkapte 3 kihel ci-in CNF thugenpi Salai Htet Ni in genkhia hi.
Hih Hakha Police Station simna hangin SAC pawlte in Hakha khua sungah Thaupi leh thauneu phial lot ziahziah banah mun khempeuh ah misitna (Checking) nasiatak nei uh ahih manin, mipite kizasak kawikawi a, kidop ciat dingin CNF thuneite’n gen uh hi.
Abeisa October 13, 2025 ni-in Hakha township, Vanha khuaneu ah Sanginn pen Ukna buluh (SAC)te’n sangnaupangte sangkah laitak zingsang (10:00am) hun pawlin Bomb khiat uh a, sangnaupang pasal (kum 8) khat leh numei (Kum 12) khat si uh a, 21 liam uh hi. Abeisa 2024 July kha sungin zong CDF- Hakha makaihna mah tawh Hakha Police Station pen buluh ngei khin uh a, Thongkia pasal 49 leh numei 13, vekpi gawm 62 honkhia zo uh ci hi.
Hits: 4