Chni State, Tedim township ah Ukna buluh (SAM)te in gal maimawk / gal antan dingin a mat uh Suangpi khuami tangval 16 te pen mipi galkap PDF Zoland pawlin November 7, 2025 ni-in honkhia / lakhiakik zo uh cih thu khuamite’ tung pan kiza sawn hi. Tua kiman tangval 16 te pen Tedim township, Suangpi khuami vive hi uh a, abeisa November 3, 2025 ni-in Tedim- Taingen-Kalay lampi zui-in gal mainawk akuan Ukna buluh (SAM) te tawh kituak in, tua lai pan a mat uh ci hi.
Tedim- Taingen – Kalay lamzikpi zui-in gal mainawk akuan Ukna buluh (SAM) te Mipi galkap PDF-Zoland te’n na pang uh a, kikaptuahna a neihna pan matthuak Suangpi tangval 16 te honkhia / lakhiazo uh cih PDF-Zoland lamin gen uh cih kiza hi. ” Kikaptuahna mun pan sanggam teng kihonkhia zo suak ve. Tua kikapna ah Mine kisiahna hangin Ukna buluh (SAM)te bel 5 si-in, 10 val liam uh” ci-in PDF-Zoland thuneite’n gen uh hi.
Ukna buluh (SAM)te bel a honpi in Taingen lam manawh in lutsawm uh ahih manin, kikapna nasia to semsem ding cih kiza hi. Tulaitak dinmun pen Ukna buluh (SAM)te Kalaymyo pan Taingen lam a lut sawm 200 kim leh Tedim lam pan 200 kim mah pha uh a, galmai 2 tawh Tedim khuapi a lutsawm uh ci hi.
Tua bangin Kalay – Tedim kikal ah Ukna buluh (SAM) leh mipi galkap PDF-Zoland te kikaptuahna / kipantuahna-ah Tedim lam pan a kuansuk Ukna buluh (SAM) pawlte’n Canady (Thuamvum) mual kheng / kantan zo in, Akluai khua kiang ciang tung ta bek tham loin, Taingen khua lam manawh ta uh cih thu kiza hi. Ukna buluh (SAC/M) te phualsatna Thuamvum (Canady) Camp pen abeisa November 2023 sungin PDF-Zoland pawlin lakhiatsak uh a, SAM pawlin Vanleng nangawn tawh nasiatak kap uh himah leh khahsuah veve uh hi.
Chin State ah Chin Brotherhood (CB) ahi a, Chinland Council (CC) pawl nihte in Falam khuapi, Mindat, Kanpalet, Matupi, Cikha, Rih Khawdar, Lailenpi, Cyindwe, Makeumnu, Naring, Rihzua, Webulah, Sur khua, cih teng lakhiazo uh a, Paletwa khuapi leh Sami khuapite nih pen Arakan Army (AA) pawlin lakhia in, tuni ciang dong ukcip phot uh hi.
Tua hi in, tulaitak Hakha, Thantlang, Khaikam, Tedim khuapi 4 teng bek Ukna buluh (SAM)te in ukcip lai uh ahih manin, SAM khut sung pan a vekpi lakhiat zawh mengmeng nading Chin Revolutionary kici khempeuh in hanciam san laitak ciat uh cih kiza hi.
Hits: 0