Tongsan ~ November 4, 2026
Zogam leilu leitaw lam kizopna a lem zawk nading le kilemna a om semsem theih nadingin Mizo pau pen tangpi kampau dingin zathuai hi cih CPU/CPA thuzekpipa Salai Yaw Mang in gen hi. Abeisa November 3, 2026 ni, Aizawl khuapi, Mizo gam, India ah Chin Pawlpi Mizoram makaihna tawh a kibawl Chin Kum Thar pawi ah tua bangin thugenna a nei a hi hi. Zogam sungah khua khat le khua khat pau zat kibat lohna pen Zomite adingin kibatlohna khat ahih tei hangin hih pen zia kibatlohnate kigawmkhatna ahihna zong hiveve hi cih Salai Yaw Mang in gen beh hi.
A zenzen in Mizo pau pen tangpi pau in a kizang hileh Zogam leilu lam le leitaw lam kizop kikawmna te anopzawk banah Mizogam tawh kizopna ah zong tampitak nuamtuam mahmah dingin ka lamen hi ci-in ama muhna gencian hi.
Pau kibang kizopna neihna pen pilsinna, cidamna, le sumbawlna kizopna te ah zong khantohna tampitak piangsak ding hi ci hi. Zogam galtaite huhna hong pia Mizo kumpi le mipite tungah lungdamkohna, mailamah zong langnih phatuamna le khantohna a piang thei dingin a lametna te Salai Yaw Mang in tua pawipi thugenna ah gen hi. Hon tung ding kum ciang Kawlgamah nasiatak kikhelna lianpi hong piang thei ding, tua adingin Zomite kiginkholhna neih tek ding hanthawtna nei beh lai hi. Tuaitak Kawlgam buaina, galvai le gamvai lemlohna kawmkal pan Zomite in mailam nuntakna hoih lampite bawl thei dingin Mizogam tawh kilemna, kitelsiamna le kipawlkhopna a khauhpai semsem ding kisam ahihna nasiatak genzaw deuh hi.
CPU/CPA cih pen Chin People’s Union/Army cih kipawlna khat hi a, Zogam leitaw lam om thau tawi kipawlna kigawmkhawm a, November 15, 2025 ni in CPU cih min nuai ah CPA tawh kipawlkhawm uh ahi hi. Tulaitak in hih kipawlna ah Salai Yaw Mang pen General Secretary a sep laitak ahihna the Irrawaddy website pan September 8, 2026 thusuahna pan kimu thei ahi hi.
Soruce : Kimo media, and The Irrawayddy
Hits: 0