Kalay – Gangaw – Falam leh Tedim township tengah Ukna buluh (SAM) galkapte leh Chin Revolutionary group kipawl khawmte nasiatak kikaptuahna nei uh a, SAM galkapte Major leh Captain level akipan galkap 100 kim si uh a, galmat honkhat leh galvan thauvui thautang tampi zong ngah khia uh cih kiza hi. Hih Ukna buluh (SAM)te in Chin State sungah lutzawh nading a hanciamna ah Chin Revolutionary kipawl khawmte ahi Chinland Council (CC) leh Chin Brotherhood (CB)te kipawl in, nasiatak do/ khaktan uh ahih manin kikaptuahna nasia mahmah hi.
Chin National Fornt (CNF/CNA) te’ makaih Chinland Council (CC) pan galmai nawk No (1) leh (2) te in Kalay Township, Gangaw township, Falam township leh Tedim township sung tengah galdona leh khaktanna nei uh ci hi. Tua banah Chinland Council pan galmai nawk No.(1), pawl pan Vakok – PDF, ABDS, PDF District Forces, Yaw Defense Force (YDF), leh PDF tuamtuam kipawl khawm in, Kalaymyo leh Gangaw kikal ah SAM galkapte tawh kikaptuah uh ci hi.
SAM galkapte in Vanleng leh Drone zangh in do uh himah leh Chinland Council leh a kipawlpihte khauhpai mahmah uh ahih manin, SAM galkapte Major leh Captain akihel galkap 100 kim simang banah galmat honkhat leh thauvui thautang zong tampi ngah khia uh cih kiza hi.
Hih Chin State kikap/ kidona ah SAM lamte’n abeisa November 6, 2025 ni-in Vanleng tawh 4 vei, November 14, ni-in Jet Fighter tawh 7 vei, Y-12 vanleng tawh 1 vei, November 15 ni-in Jet fighter mah tawh 2 vei, November 17 ni-in, Jet fighter tawh 2 vei, Y-12 tawh bomb tang 50 val khiat, November 17 ni mahin Jet fighter tawh 4 vei cih bangin Vanleng tawh nasiatak kap ngekngek uh ci hi.
Tua banah Chin Brotherhood (CB) pawlte galmai nawk No (2) pan Chin National Defense Force (CNDF), PDF-Zoland leh akipawlpih tengin zong Falam khuapi leh Webula khuapi kikal, Tedim khuapi leh Khaikam khuapi kikal tengah SAM galkapte tawh kidotuahna nei uh hi. SAM lamte in zong November 17, ni ciang dong Vanleng tawh nasiatak kap ziahziah uh cih kiza hi.
SAM pawlin bel Chin State, Falam khuapi leh a khahsuahsa mun leh khuapite lakik zawhna dingin galkap tha nasiatak behlap in gal maimawk laitak uh ahi hi. Tua bangin a hanciamna ah Chinland Council (CC) leh Chin Brotherhood (CB)te zong kipawlkhawm thei bek tham loin, amau panmun tuakah nasiatak do ngekngek uh ci hi. Ahi zongin SAM te in nung kha sungin Taingen leh Webulah mun nih lakhiakik pak uh ci-in, Chin gal mainawkte’n gen uh hi.
” Hih bang a gualzawhna pen Chinland Council (CC) leh Chin Brotherhood (CB)te kipawlkhawm in, SAMte a dokhopna hang ahih manin, Chin State mipite zong genzawhloh lungdamna kinei hi. Maban om laite zongah mapang khawmin SAM te khaktan zawhna ding kilunggulh mahmah hi.” ci-in Chin Revolutionary pan galkapte in pulakkhia hi.
Chin Brotherhood (CB) leh Chinland Council (CC) khut kilenin mapankhopna pen thungetna leh thapiakna akipan panpih theihna lampi tuamtuam tawh mapanpih bek tham loin, kipumkhatna leh kipawlkhopna a siasak thei kampauna, gamtatna leh a hoihlo ngaihsutnate peuh mah nusiat zawhna ding thupi mahmah ahihna Chin Revolutionary galkapte’n genkhia uh hi.
Hits: 7