Tedim khuapi a om Ukna buluh( SAM)te’ gal phualpi Infantry battalion (269) pan galkap 100 val abeisa October 29, 2025 ni-in Taingen lamah galsim ding kuan khia uh a, PDF-Zoland ten kap pah loin Thuamvum (Kennedy) Camp ah lutsak phot uh ci hi. November 18, 2025 ni-in PDF-Zolandte’n nasiatak kap petpet uh a, Ukna buluh (SAM) pawlte Medical Officer khat leh adang 7 sipah in, battalion makaipi Major Hla Myo Htut kihel 4 te lim liam mahmah uh ahih manin, Tedim zatopi kipuak ci hi. PDF- Zoland pawlin Thuamvum Camp lakhia kikzo bek tham loin, galvan zong hon khat ngah beh uh cih thu kiza hi.
Hih Thuamvum Camp pen galvai ading mun thupi khatin kiciamteh ahih manin, abeisa 2023 November kha sungin PDF-Zolandte’n lakkhia zo / ukcipzo uh himah leh nung October kha bei kuanin SAMte’ tawh kikaptuahna pan khahsuah kik pak uh hi. Ukna buluh (SAM)te in Chin State leilu lam, Tedim – Taingen tengah nung October kha sungin galkap alom atang tawh lei lam, van lam pan nasiatak gal mai nawkna nei kik uh a, Chinland Council (CC) leh Chin Brotherhood (CB)te kipawl khawmin nasiatak dokhawm thei uh ci hi.
Hih kikaptuahna ah Sagaing Division, Kalay township lam pan Tedim- Taingen lam manawh in, SAM te’n gal mainawk kuanto uh a, tua bang mahin Tedim khuapi lam pan zong Taingen lam manawh in, gal mai nawkna nei uh hi. Tua kawmkawm mahin vanleng tawh vial 26 vei bang Tedim khuapi ah galkap puak beh ziahziah lai uh ci hi. Tua manin Chin Revolutionary group te’n mun pawl khat khah suah uh ahih manin, Kalay – Taingen-Tedim lampi teng Ukna buluh (SAM) te’n ngah kik uh hi. Tua banah Sagaing Division, Kalay township pan Falam township, Webula lamah Ukna buluh (SAM) galkapte a honhon in kuankhia leuleu uh a, Webula khuapi zong ngah kikzo uh ci hi.
Ahi zongin Chin Brotherhood (CB) leh Chinland Council (CC)te mapang in dokhawm thei uh ahih manin, Falam tawh Tai- 12 kigamlatna Manipur Gun kiang leh Kalay- Gangaw – Tedim – Falam khuapi tengah kikaptuahna nasiatak nei uh a, SAM lamte a si aliam tampi om banah Vanleng tawh tampi vei kap ziahziah uh ci hi.
Chinland Council (CC), Defense Department pan a tangkona ah November 18, 2025 ni kikaptuahna tungtang ah Falam – Webula kikal, Tedim – Khaikam kikal, Kalaymyo – Gangaw kikal ah kikaptuahna nasiatak om in, SAM lamte Major, Captain leh ulian akihel galkap vekpi 100 kim si in, galvan zong a lompi kingah khia ci hi.
Tulaitak Ukna buluh (SAM) galkapte pen Tedim – Kennedy kikal lampi dung Tedim khuapi lutna Saimual tengah phualsat uh cih kiza hi. Tua banah Kalaymyo pan Taingen lamah SAM galkapte a lom atangin kahto in, Taingen khua Camp ah phualsat laitak uh cih kiza hi.
Hits: 2