Sagaing Division, Shwebo District, Khin Oo township, Monlah khuano ah phualsat a om Ukna buluh (SAC/SAM)te leh Pyusaw Htee te tukha November 12-23 ni dong Khin Oo township Revolutionary Force te tawh nasiatak kikaptuahna om uh hi. Tua kikapna ah Ukna buluh (SAC/SAM) leh Pyusaw Htee pawlte battalion Commander akihel 60-80 kim si zihziah uh a, battalion nangawn bei lawh bek tham loin, a damlai sun teng zong November 27, 2025 ni-in Kantbalu town lamah nungkik mang ta uh cih thu kiza hi.
Kikapna mun pen buh cinna lo sung ahih manin, SAC/SAM galkap a site’ luang hawmte SAC galkapte’n lakhia loin nusia cip uh ci hi. Misi luangte losung a munmun ah muat / pawm gawpin namsia / uih mahmah ta ahih manin, Khin Oo Revolutionary kipawl khawmte in kaikhawm in Mei tawh halin vui bawl uh ci hi.
November 19, ni in Khin Oo township Mon Lah khua ah Kantbalu Township lam pan SAC/SAM galkapte 300 kim tawh khatvei a lut kik khit November 23, 2025 ni-in Khin Oo Area Pyinthaung khuaneu a om Pyusaw Htee te’ Camp lamah a kuan laitak Revolutionary Force te’n SAC te’ battalion bei lawh liangin, nasiatak nuaizial mang zo suak hi. Khin Oo nitumna lam pen ni 17 sung vilvel SAC/SAM te tawh kikaptuahna hangin, akim akiang a khuaneu 20 val pan khuami 10000 asim taikhia mang uh ci hi. SAC/SAM te zong tua khuate pan paikhia ta uh ahih manin galtai khuamite zong Inn lum zuan kik ta cih khuamiten gen uh hi.
Hih kikapna tawh kisai in, Kantbalu township, Wattu khua ah phualsat a om (111th Infantry Battalion, Headquarters (TA-33) ah SAC/SAM galkap 100 valte November 12, ni-in Khin Oo township lamah galmai nawk dingin kuanto uh a, Revolutionary Force te’n Tin Taih khuaneu kiangah nasiatak kaptuah uh ahih manin, SAC/SAM lamte battalion Commander akihel 60-80 kikal si uh ci hi. Tua banah galvan namtuamtuam ahi; Ngasa mei Lawng 1, 10 MA-1s, 3 MA-2s, 1 BA-100/60mm Commando Diamond Rifle, 3 MA-3s, 1 MA-4, 4 G-3s, 1 MAS Sniper, 5 M1s leh thautang nam kim alompi in ngah uh cih kiza hi.
Hits: 2