Mandalay Region, Mogok khuapi pan tai(2) gamlatna ah Ukna buluh (SAC/SAM) galkapte leh PSD beel pawlte nasiatak kikapna kipan ta cih khuamite’n gen uh hi. November 30, nitak lamin Mogok khuapi kiang Sinkhwa, Kyaukwa, Chuang Gyi Baw Badan khuaneu lam tengah kikap uh a, tuni December 1, ni-in zong nasia mahmah ci-in Mogok tual sung mite’n gen hi.
” Kikapna nasia mahmah. Thaupi ging bang matzet in kiza ziahziah himai. Khuapi sungah a om lai tualsung mite bel kilau/ kilunghimawh mahmah hi. Gal kidona om cih theihsa himah leh upmawhna sangin nasia zaw tham” ci-in Mogok tualsung mite khatin gen hi. Zannitak kikapna-ah SAC/SAM pawl 20 val si ta cih kiza hi. SAC/ SAM galkapte sungah Training manzo phette gal mai nawk sak uh a, a site zong tua Training zo tung teng hipah ci hi. A diakin SAC/SAM te’n Training zo tungte bekbek zangin, Mogok khuapi pua lam paikhia uh hi” ci-in, Mogok khuamite khatin gen hi.
Mogok khuapi pen abeisa November 29, 2025 nitak lamin SAC/SAM galkapte Motor tampi tawh lut ta uh a, Traning manzo phet galkap naupang bulom tawh kigawm vekpi 1000 kim pha uh ci-in, khuamite’n gen hi. Ta’ang National Liberation Army (TNLA) te’n abeisa October 29, ni-in paikhiat ding thusuah a bawl khit Khakhat sung a sawt khit November 29, ni-in SAC/SAM galkapte lut uh ahi hi.October 29, ni thusuah a bawl khit teh Mogok khuapi dal dingin Mandalay Region sung a om PDF beel pawlte leh Magwe, Sagaing lam pan PDFs te Mogok khuapi lam ah tung ziahziah ta uh suak hi.
November kha lai sungin TNLA te’n Mogok khuapi pen SAC/SAM te’ khutah piakhia uh a, PDF kipawlkhawmte’n kaploh dingin thusuah bawl uh hi. Tua manin PDFte leh beel pawlte’n Mogok khuapi pua lamah nungkik uh suak hi. TNLA leh SAM te’ thukimna a vekpi akitheihloh hangin, Mogok khuapi sung pan Mogok khuapi sung mun pawl khatah Thaupi lemin, koih zihziah bek tham loin, khuapi pua lam a gal kikapna mun lamah Thaupi lawn ziahziah cih kiza hi.
Hits: 2