Chin State leilu lam a om Falam khuapi lakkik nading SAC galkap 1000 val January 24, 2026 ni-in lampi thum tawh kuankhia in panlakna nei uh a, Chin Brotherhood le akipawlpih mipi galkapte in nasiatak in khakcip uh ci-in Chin Brotherhood sum bul zonna Online ah CNO/CNDF thugenpi Salai Timmy in genkhia hi.
SAC galkapte Falam khuapi nitumna lam le nisuah lam ah galkap 800 – 1000 kikal in kha 3 sung vingveng gal mai nawkna uh hi. A sawt loin Kalaymyo pan Khaikam khua nawkin galkap Mawtaw tawh galkap 200 val kuanto in Taingen nawkin Falam tawh tai 40 val gamlatna mun tung ta uh, ci-in genbeh hi.
Abeisa November 2025 kha akipan SAC in galmai nawkna kipan uh a, Kiteelna ding vai tawh a khah suahsa khuapi leh munte a lakkik zawhna ding ngimna tawh Chin State leilu ah galdona nasiatak nei uh, ci-in mipi galkap (FDF)te’n genkhia hi. Mipi galkapte (PDF) lamte’n zong kha 2 sung bang a dalna uh a, SAC galkapte tampi a sih banah galvan zong tampi ngah uh hi.
Tua banah Chin State khang lam Magway gamgi zongah SAC galkapte lut uh a, mipi galkapte tawh kikaptuahna nasatak om hi. “Falam manawh in gal lampi thum ah kikhen in galkap 1000 val tawh hong kuan laitak uh ahi hi” ci-in CB thugenpi Salai Timmy ingen hi. I ngahsa khuapite kep cing zawhna ding le SAC te’ ukna khuapi nihte ahi; Tedim leh Hakha khuapite banah adang khuapite lak zawh nading mipite’ panpihna kisam mahmah hi ci-in, CB thugenpi Salai Timmy CNO/CNDF in hanthawn hi.
Hits: 0