Chin State ah gal kidona hangin mipite a lomlom in galtai mipi 100000 val om uh a, India gamah a taisuak / gambel mipi 60000 val om ta ci hi. Hih galtaite in annek leh tui dawn akipan nikteen puansilh, vanzat tawm ding cihte dongah haksatna lianpi thuak uh hi. A diakdiak in sum ngahna / sumlut neilo banah vanman leh vanpuak thaman tam luatna hangin, amau’ kisapna taktak sung pan mimal 100 ah 5 (5% percent) ciang bekin ahi ciang khat dinmun ah nuntak khuasakna nei zo bek uh, ci-in Institute of Chin Affairs (ICA) in January 27, 2026 ni-in pulak khia hi.
Tu laitakin hih i sanggam Chin galtaite (Chin IDP) te’ huhna kitangsam kisapna za-ah sawmkua le nga (95% percent) te in kicing in ngah zolo in, hehpih huai leh genthei lua mahmah dinmun ah om uh ci hi. Institute of Chin Affairs (ICA) lam pan vaisai khatin a genna-ah, “Huhna sum le pai a om hangin van puak thaman tam tung lua mahmah ahih manin, Van ii lei na zah tawh kikimphial bei mawk hi. Tua bek tham loin gal leh sa haksatna hangin vai haksatna lian semsem in, a huhna leh panpihna i pia nuam zongin, a hun lapin a mun / a phual kitun zolo hi” ci-in tulaitak Chin IDP te’ haksatna genkhia hi.
Cidamna lamah zato vanzat leh zatui zaha akipan a kitangsam tuamtuamte puakna / thaman zong Kawlzang pan kipuathei nawnlo ahih manin, Mizoram lam mah pan kilei / kila vive ahih manin vanman mahmah a khan luatna hangin, kicinlahna tam mahmah, ci hi. Tua banah SAC Military council pawl in van lam zangin gal dona tawh kisai a lauhuaina hangin galtai (IDP) te a dingin cidamna vai bawl nading mun muanhuai kiciantak seh theih nading cihte zong vai haksa mahmah khat hi lai ci hi.
Hih ICA huhna leh panpihnate hawm khiatna / piakkhiatna ah a kisam masa pen khat ahi; giahphual ding deubuk le nek ding nei lote ading nek le-dawn vaihawmna kinei sak ci hi. Laisinna lamah hun saupi ding gelna a om hangin sum le pai kicinlohna hangin, nasepna / sepkhiatna tawh kisai haksatna tampi om ci hi.
“Gam sung gam pua, kipawlna tuamtuam tawh kizom a khut kilenin ma kipang khawm hi. Migitna le lainatna paulap in, nasemte pen kumpi ki-ukna tawh meh khawm in, a meet bawl nuamte kizopna nei kei ung” ci-in ICA vaisai khat in deidanna a neih lohna thu le amau dinmun tawh kisai Tongsan Media tungah genkhiatna nei uh hi.
Hits: 3