Chin State, Tonzang khuapi veng thak khenna leh ki-ukna lam tawh kisai akiphuhzawh nading vaihawmna akihanciam laitak in, CNF leh CDF-Tonzang te gal phualpi pen ZRA (EC) te’n Drone tawh kap zan sak uh a, tua hang mahin, lang nih galvai kitelkhialhna khang semsem cih kiza hi.
Thu omzia pen January 28, 2025 ni zingsang nai (05:00Am) hun pawlin Nakzang khua-a om Chin National Army (CNA) Brigade 4 leh CDF-Tonzang galphual pen ZRA (EC) in, van lam pan drone tawh bomb tangpi 2 khiatin, kapzan sak uh ci hi. Ahi zongin Bomb tang khat bek puakkham in, a liam leh a si omlo banah inn leh lo siatna omlo, ci-in CDF-Tonzang in pulak khiatna nei hi.
Tulaitak Tonzang Township Council leh CDF-Tonzang in galtai (IDPs) te ading innmun thak vaihawmna a neih laitak leh Tonzang khuapi kimakaihzia ding a geel san laitak uh, ci hi. Galvai thukante genna-ah, ZRA-EC in Chinland Council (CC) vaipuak buaisak nading leh mipite lauhthawng sak nading vilvel tawh a gamta uh hi, cih kiza hi. ZRA-EC pen Ukna buluh ngongtat (SAC) galkap pawl tawh kizoppna nei hi, cih mawhsakna leh upmawhna zong om ci hi.
Abeisa 2024 April sungin Tonzang khuapi pen CDF- Tongzangte khut sung pan lak kik sawmin nih vei kuan khia uh a, ahi zongin lazo paklo in a nungkik lam ciangun Nakzang leh Buangmual khua innte mei tawh hal tum sak mikmek uh, ci-in kigen hi. Hih thute tawh kisai Zomi Revolutionary Army – Eastern Command (ZRA-EC) in, Zogam bit nading le ei-le-ei ki-ukna / kikepbitna bek hi, ci-in gen uh ci hi.
SAC pawl tawh mapang khawm pawl cih ngawhna pen deihlo / nial thal den uh ahih hangin, Tualsung mipi galkapte in ka ukna gam sung uh ah hong simlut, gam kekin hong kuan den uh hi, ci-in dawn kikna nei zel uh cih kiza hi.
Hits: 2