Tedim township New Suangpi khua pan Ukna buluh (SAC)te’ launa tawh Inn le lo nusia in, galtaina pan inn lam vil kik dingin, a ciah pak (kum 38) papi khat January 25, 2026 ni-in khua lutna lampi ah SAC te’ phum bomb sikkha ahih manin, a khe veilam kitantawng ci hi.
Bomb sikkha Pa Khuang Tin Mang pen abeisa January 20, 2026 ni-in, Ukna buluh ngongtat (SAC) galkap-te a khua sung ah lut uh ahih manin, khua-mite tawh lau in gamlak ah a tai mang ahi hi. January 23 ni-in SAC galkapte a khua pan paikhia ta cih thu a zak ciangin, lunghimawhna tawh inn vil dingin, a ciah pak hi-in, hih bangin tuahsiatna a tuak vat, ci hi.
“Amah pen tulaitak Zato ah siavuan siama-te kepna nuai-ah zatui zaha tawh a kibawl laitak suak phot hi. A khe veilam khuk nuaisiah a kitantawng himai. ” ci-in khua-mi khatin gen hi. SAC galkapte pen Taingen khua pan Falam lam zuanin a pai uh hi-a, New Suangpi khua-mite gam-lak leh kim le pam khuate-ah galtai uh ci hi.
Hih bangin bomb a puakkhap ciangin, khua sung mun tuamtuam zongah akiphum bomb om lai ding cih patauhna tawh galtai khuamite in inn lam zuan ngam nailo uh ci hi. New Suangpi khua pen Tedim leh Falam gamgi, Taingen-Falam lamzinpi tungah om khuaneu khat ahi hi.
Hih lampi pen SAC galkapte in a limzuih mun mahmah na lampi ahih manin, mipi galkap Thawu tawite tawh akido / a kikaptuah munna zong ahi hi. Chin state sung lamzinpi a om khuate pen SAC galkapte in totna bek hi loin, giahphual satna-in nei zong nei den uh hi.
SAC galkapte’n khua khat / mun khat peuh a nusiat ciangin, mun khempeuh ah Khesik bomb phum / khak hamtang uh ahih manin, tualsung mite in tuak kha thei zel uh a, pumpi hemna le poina banah sihna dong a tuak lawh tampi om ci hi.
Hits: 1