National Unity Government (NUG) leh Kachin Independence Army (KIO), Karen National Union (KNU), Karenni (KNPP), Chin National Fornt (CNF) cih tengin gal vai (Military) leh gam vai (Politics) kipawlkhopna ngat tak nei-in, maban kalsuantoh dingin holimna nei uh cih thu KIO makai Lt. Gen. Gun Maw in February 5 ni akinei America gam, Texas state a kibawl a (65) veina Kachin Revolution Day ah online ah thugenna pan genkhia hi.
Ama genna ah tu-a mipi lakah genpi akinei “Federal Leadership Council” pen thukician hi nailo a, galkap nasepna tawh kisai lawhcing nading lunggulhna tawh holimna nei uh ahih thu gen khia hi. Revolution nasepna-ah mapang khempeuh in thuman lampi tungah khut kilen-in, khat leh khat kizahtak tuahna a om theihna ding gen hi. Gal vai leh gam vai-ah pilvang takin kipawlkhopna pen lawhcin bulpi ahihna thu pulak khia hi.
Tua bek tham loin, revolution nasepna sungah mipi-te kihelna leh mipi tawh pankhopnate thupi takin zat theihna dingin, ei le ei ciat ki-sittel nading cihte thapiakna nei hi. Hih holimna-ah a kihel Thau tawi pawl 5 teng pen (K7) kici uh a, mipi theihna ah mualmi thau tawi kipawl khawmte’ sungah a thahat zawdeuhte cihna tawh kiphuak ahi hi.
Hih (K7)te’ nasepbulpi ahih leh ukna buluh ngongtat (SAC) galkap pawl dona/ langpanna ah gal vai tawh kisai leh gamdang tawh kizopna lamah nasiatak kalsuan khop nading (Joint Leadership) ah mapan khop theih nading deihna leh Revolution nasepna ah mipi lam-et mahmah hun laitak in hih bang holimna kinei ahihna thu pulakna nei uh hi.
Hits: 1