Tongsan, September 4, 2026
Kachin gam, Shwe Ku pan Bamaw ah Ayeyerwadi gunpi dung zui a, a pai to Kawl galkapte tembaw honkhat KIA le a pawlte in va khaktan uh a, tembaw 8 suksiatsak thei in, dialkang khaina ki-apna tawh galkap, palik le a innkuanpihte a vekin kigawm 190 kimankha hi cih KIA galkap thugenkhiatna information lam pan in gen uh hi.
Kawl galkapte pawl pen Mandalay, Gawweih tembawl phualpi pan August 21 ni sun 11:32 in Ayeyerwadi gunpi dung zui-in hong kahto uh ahi hi. Galdona tembaw pi 2, galkapna tembaw 4, tembaw mawkmawk 1, vanpuakna temmbaw 8 cih bangin a vek kigawm tembaw 15 pha uh cih kiza hi. Tua gal tembaw honpi hong kahtoh laitak uh Phazinbone-Shinkhan kiim a tun uh ciangin KIA le a pawlpihte in gal nanna na nei uh hi. Gal tembaw 8 mankha uh hi.
A dangte pen August 27 ni in Shwe Ku ah hong tungto uh a, September 2, ni-in Bamaw lamah a paina uh pan KIA le a pawlpihte mahin nasiatakin na nang uh ahih manin nasiatak kidona piang leuleu hi. KIA galkap thuzaksakna phualpi lam pan “Mandalay pan hong pai gal tembaw te pen August 27 ni Shwe Ku hong tung to uh hi. September 2, ni-in Bamaw hong kahtohna lampi ah KIA le a pawlpihte in gal nannna a kinei ahi hi. Tua ni mahin gal tembaw 2 kisusia thei hi. A dang tembaw te sung pan galkap, palik le a innkuanpihte a vekin kigawm 190 in dialkang khai in ki-apna nei uh ahi hi” ci-in gen hi.
Dialkang khaina tawh hong ki-ap mi 190 sung pan galkap 150, palik 17, numei 16 le naupang 6 cih bangin kihel uh ci hi. KIA galkap thuzaksakna phualpi in “Shwe Ku – Zinbone pan dialkang khaina tawh hong ki-apte a vek un 190 pha uh hi. Galkap 151, palik 17, numei 16 le naupang 6 pha uh hi.” Ci-in genkhia uh hi.
A dang gal tembaw te lak pan 6 te pen September 2 ni nitaklamin Zinbone-Shin ah suaktak uh a, Bamaw khuapi gei Yeni khua nai kiim ah kibu uh cih kiza hi. Tembaw khat pen lampi ah kisia ahih manin Bamaw a tunma lampi ah nusia uh ci hi. KIA genna ah Mandalay pan hong kahto galkap tembaw 15 sung pan 8 pen KIA le a pawlpihte in do in, kisuksiatsak hi. Tua sungah galkap, palik le innkuan mimal kigawm 190 te zong kimankha uh hi, cih tangkona nei khia uh hi.
Soruce : Khitthit news
Hits: 1