Myanmar gam ukna buluh (SAC) makaipi Min Aung Hlaing in, mualtung mi Thau tawi (Ethnic Armed Group) te leh NUG galkap (PDF) khempeuh tawh gamvai buaina tawh kisai Sabuai phung ah kikumkhawm dingin sapna a neihna thu September 26, 2024 nitak lamin pulakkhia hi.
Gam sungah kilemna leh khantohna ding gammite tawh khut kilenin sepkhop theihna dingin Thau tawina / kidonate nusia in, Party gamvai leh kiteelna tawh kisai lampi dik tawnin sepkhopna ding thute zasak hi. Myanmar gambup kiteelna ading in mimal simna zong October 1, 2024 ni-in, kipan ta ding ahih manin, SAC in kiginkholhna nasiatak nei uh ahihna zong genkhia hi.
SAC lamte’n Mualmi Thau tawite leh PDF te tawh gamvai kikupkhop ding sapna aneihna tawh kisai-in, NUG makaite leh Mualmi Thau tawite tung pan thukimna om leh omlo cihte kician nailo ci hi. Ukna buluh (SAC) makai Min Aung Hlaing in bel abeisa October 15, 2023 ni akibawl NCA Thukimna bawl zawh Kum 8 cin lai in zong Mualmi Thau tawite tawh NCA thukimna bawl ding sapna nei ngei khin ci hi.
SAC ukna a deihlo NGU khut nuai a om PDFte leh a omlo PDFte khempeuh pen SAC in thukuppih ding a khatvei sapna bek tham loin, Ngongtat nasem pawlin ciamteh in sukmai mang dingin Min Aung Hlaing in a tangko den hizaw lai hi. Kawlgam leilu lamah Thau tawi Kipawlna Unau 3te ahi; Ta-ang National Liberation Army (TNLA), Kokaang Army (MNDAA) leh Arakan Army (AA) te pen Ngongtat langpang kipawlna ci-in, SAC in abeisa September 2, 2024 ni-in pulakna nei zaw lai hi.
Hits: 2