Chin State, Falam township, Lumnte khuano a om Zato Inn (Hospital) pen abeisa November 26, 2024 (11:30am) hun a Ukna buluh (SAC) te in gal kikapna om lopi-in, Galvanleng tawh nasiatak a kapna hangin,Zato nasem 2 leh zato lum khuami 7 si uh a, 4 a liam banah akim apam a om Inn tampi meikang tum ahihna thu November 29, 2024 ni-in NUG in thusuah bawl uh hi.
Hih Ukna buluh (SAC)te’ gamtatna tawh kisai-in thumanlo taktak bek tham loin, mihingte’ tungah mulkim hetlo in tatsiatna ahih manin, UN leh gam tuamtuamt’en khutzep in gal et mawk loin, lampi tuamtuam zangin SACte khaktanna / vauhilhna a neihna ding NUG, Heald Department in ngetna leh tawsawnna thu pulakkhia hi.
Zatopi leh zato lumte ngim gige a hih bang gamtatna pen Geneva Convention kici UN Security Council thukhensatnate tawh kizui-in, mihing hehpihna neilo gamtatna leh mihing suahtakna tawh kisai leitungbup thukhunte palsatna taktak hi ci-in, NUG in genkhia hi. Nuntakna khamin mipite’ cidamna ding akem, a khoi Zato Siavuan / siamahte leh sihna manna a tuak khuamite khempeuh tawh kibangin a dahpihna leh thuman kimuhkhiatna ding nasiatak hanciampih / seppih ding cih zong genbeh hi.
Chin State, Mindat, Falam leh Thantlang township te ah tukha Nipi nunung sung ciang dong Ukna buluh (SAC) leh Chin Revolutionary group tuamtuamte kikal kikapna nasia mahmah a, SAC lamte’n Vanlam tawh a hih theih zahzah in, nisim phial mahin kap ngekngek uh cih Chin Revolution te’n gen uh hi. Ukna buluh (SAC) in ukna alakkhiat akipan Kawlgam bupah tuni ciang dong Zato leh zato nasemte muitum nei-in, tulval vei asim Vanleng tawh a kapna thu Switzerland gam pansan Mihing nuntakna huu leh kepna lam (Insecurity Insight) kici pawlte’n November 15 ni-in thusuahna nei uh hi.
Kawlgam bupah SAC te’n vanleng tawh a kap Zato leh zato lupna leh Cidamna lam tawh kisai Zato Inn kisia vekpi pen 180 val kisia khin a, cidamna lam nasem a tawm pen 97 si-in, liamna baihna ngah 117 leh a kiman vekpi gawm 880 val om ta ci-in genbeh uh hi. Tua hi-in, hih vai tawh kisai akihelkha kipawlnate khempeuh in International Human Right tawh kisai thukhunte zuih ding, cidamna lam nasem / zato nasemte leh Zato innte dal leh keppih dingin ngetna nei uh hi. Hih bang sihna leh siatna khempeuh a sem / a gamtate ngiat in vaipuak a lakna dingin Insecurity Insight pawlin pulakkhia uh hi.
Hits: 0