Nepal, India leh China gam nitumna lam leitung mualsang pen ahi Mount of Everest tawh Km 80 (50 miles) kigamlatna Tibet Region sung Mualtung gam Tingri khuaneu pansan in January 7, 2025 (09:00am) hunin magnitude 6.8 tha tawh Zinling hi. A tawm pen mi 126 val si khin a, 200 val liam in, inn a tawm pen 100 asim kicimzan ci-in China thuneite’n genkhia hi. A si aliamte hotkhiatna nasem pawl (Rescue Team) 1500 val leh galkap 200 val kuansak pah a, tuni Wednesday ni dong nasiatak zongzong lai uh ahih manin, misi kibehlap thei lai ding cih ki ummawh hi.
Tinggri khua buppi kinak siat mahmah a, Inn kicim nuai ah a si aliam tampi om thei lai dingin thuneite’n gen uh hi. Misi a tawm thei pen om theihna ding hotkhiatna nasem pawlin zonkhiat mengmeng dingin Chinese President Xi Jinping in pulak hi. Zinlingpi khit nai 9 sungin a nungzui 150 vei bang kizomto suaksuak cih sazian ciaptehna kinei hi.
China gam i ukcipna Tibet region leh Nepal gamgi a zinling pen leinuai tai (6 miles) a gamlatna / a thukna pan kipan hi ci-in, US Zinlinna lam thukankhia pawl (The U.S. Geological Survey – USGS) te’n mukhia uh hi.
Hits: 6