Chin State, Tedim District, Tedim khuapi pan Chin National Fornt (CNF) leh Chinland Council (CC) galkapte a manlang thei pen a paikhiatna ding un Global Matu Organization (GMO) in January 7, 2025 ni-in thusuahna nei uh hi. Tua thusuahna sungah ” tulaitak Chin Brotherhood (CB) te’ galdona leh gamtatna mun ahi Tedim khuapi ah CNF /CC pawl lutin hong nawngkai sakna pen CNF /CC ii gamvai vang leh lim, Revolution sepna ah lim le vang kiamsak mahmah cih kimu hi. Matupi kidona hun lai mah bangin Chin mipite’ tungah maisak zawhloh khop ding gamtat khialhnate om nawn lohna dingin Tedim khuapi pan a manlang thei penin a nung kikna ding uh zaksakna nei uh hi. Nung kik nuam loin nong kalsuan veve uh leh a nungah hong piang ding buainate khempeuh CNF /CC in a buk a bekin vaipuak nei ding hi ” ci-in thusuahna sungah genkhia uh hi.
Tulaitak lian bel Chin National Fornt (CNF) leh Chinland Council (CC) galkapte in Tedim khuapi kap ding / kaplo ding cih tawh kisai thuman kician om nailo hi. Abeisa ni 2, 3 sung tengin Interim National Consultative Council (ICNCC) Rotating Chairman ahi Dr. Kenton in ” Chinland Council (CC) galkapte in Chin Brotherhood (CB)te’ mun leh phual ahi Tedim khuapi pen galdona leh thuneihna dingin hong uilut sawm uh cih gen hi.
Tua bang ahih takpi mawk leh bel Chin tangthu ah bang hunhun in a mang ngei nawnlo ding ei leh ei gal kidona leh kimuhkhialhnate hong piangto ding cih genbeh hi. Tedim khuapi pen kuakua Thau tawi kipawlna Revolutionary in a lakhiazo phial zongin, amaute’ khut sung pan kilakhia kik / kisutkhia kik veve ding hi ci-in, Dr. Kenton in ama Social media page ag pulakkhia hi. Global Matu Organization (GMO) in Spring Revolution ah biakna vai, minam vai leh political party te bulphuh hi loin, Chinland, Chin mipite leh Revolution vaite ah thuman tak leh Revolution tawh kituak nasemte khempeuh thapia in mapanpih ding cihte zong genkhia hi.
Global Matu Organization (GMO) pen Spring Revolution kipat cil 2021 kumin kiphutkhia hi a, leitung gam tuamtuam a om Matu minam khempeuh kaikhawm in, Matu minamte’ ading akisam social, cidamna leh pilna banah Matupi CDF te a panpih/ a huh amasa penpen leitungbup huam kipawlna ahihna thu pulak hi. Tulaitak Chin State ah kamciam om bangin SAC te do bek tham loin gualzawhna a ngah Chin Brotherhood pen huh leh panpih huan in, Revolution sepna ah kineih khemna tawh nasem CNF /CC te langpan ciat dingin GMO in tangko khia uh hi.
Hits: 12