Rakhine State ah SAC te leh Rakhin galkap Arakan Army(AA)te kidona pan AA pawlin a hingmat uh SAC galkap Innkuan mimal 116 leh ahang tuamtuam tawh amat Thongkia mi 26 te pen February 9, ni tengin khahkhia kik uh ahihna thu AA te tawh kinai khatin February 10, 2025 ni-in genkhia hi.
Hih a kikhahkhiate pen SAC te’ ukna nuai ah a omlo Rakhine gam sung a teng mite ahih manin, khahkhiatna hunpi khat kibawlsak hi cih thu AA ten gen uh hi. ” Tutung akikhahkhia galmat Innkuan mimal 116 te banah tualsung mi mawkmawk thongkia 26 teng kikhah masa hi. A kizom khahkhiat lai ding zong geelna kinei hi. Thukham palsatte bel thu bawlna kinei phot hi” ci-in AA te’n gen uh hi.
SAC te’ vanlam gal lauhuaina hangin, koi lai Township pan kikhahkhia cihte genkhiatna kinei thei nailo suak phot ci-in genbeh hi. Rakhine State sungah SAC te’ vanlam pan bomb khiatna hangin galmat Innkuante mimal 100 val sikhin in, 120 valin liamna ngah uh cih AA tawh kinai mi pawlkhat in gen hi.
Arakan Army (AA)te’ kep galmatte’ omna munte SAC te’n vanleng tawh kap thapai den uh hi. Adiakdiak in Myauk U township, Ramchaung kiang a om galmat Innkuante koihna mun pen abeisa January 18, 2025 ni-in SAC te’n Jet Fighter tawh bomb khiatna hangin, naupang leh numei vekpi gawm 28 si uh a, 25 liamna ngah ci hi.
Hits: 0