Sagaing Division, Kalaymyo leitaw lam khuaneu Sedaw, Yan gyi Aung, Kaw Ywa, Shia phu, Mandaw, Du Nywe, Kyauk Pho, Tin Thar, Kokain, Asih Shi, Kyan Tha, khuate SAC galkapte in tukha February 9, ni-in bomb khiatna hangin khua (11) pan mipi a tul asim galtai uh cih thu Kalaymyo tualsung miten gen hi.
SAC ten vanlam pan bomb khiatna hangin Tin Thar khuami numei khat si in, adang khua sung mite zong liam a, inn pawl khat zong kisiagawp cih khuasung mite in gen hi. Tulaitak a galtaite’ a dingin huhna kisam pha mahmah cih zong galtaite ahuh pawlte khatin gen beh hi.
Gal taite sungah inn leh lo nei nawnlote bek hi loin, a tamzaw vanleng bomb khiat ding launa tawh gal tai ngeingai uh ahih manin, annek tuidawn akipan nikten puansilh leh omna khawlna ding kisam banah, zan lam ciang khuadam ahih manin, puanza zong kisam ci hi. Gal vanleng pen tawmvei sungin leng pahpah ahih manin khuasung kiciah ngam nai paklo ding ci in, galtaite ahuh khatin gen hi.
February 2, ni-in Kawlpi kiim a om Tin Thar khuaneu pen SAC galkapte in vanlam pan bomb a khiatna hangin pasal khat si in, khuasung mi khat zong liam hi ci in gen hi. Tua banah abeisa January 31, 2025 ni in zong Kawlpi kuam Koh Ko (ကုက္ကို) khua aa om galtaite omna SAC galkap te’n vanlam pan bomb khiat ahih manin naupang leh naupaai numei khat a kihel khuasung mi 11 bang si uh a, a pumpi a them a nengin lengkek zihziah liang ci hi.
Hits: 3