Zomite’n ii neih ii ngeina Pawite sungah Khuado pawi pen athupi mahmah leh namdangte’n a neihloh ei bekin ii neih Zongeina Khuado Pawi ahi hi. COVID-19 hang leh Kawlgam buaina hangin gamsung gampua ah akibawltheihloh zawh kum 2, 3 dektak hita hi. Pasian huhna tawh tukum akipan in gamsung leh leitung mun tuamtuam ah kibawlkik ziahziah thei ta ahih manin, lungdam huai in, Pasian min ii phat hi.
Abeisa September 30,2023 ni-in Central ZOMUS makaihna tawh TBC-Y biakinn, Yangon ah Khuado Thungetkhopna leh Lasakna tawh thupitak kibawl a, October 8, 2023 ni-in Singapore Zomi Innkuan (ZIS) te’ innteekna tawh Central ZOMUS te samin Khuado Pawi thupitak mah kinei cih kiza hi.
Gamnihna Zomite’ tam mahmahna ahi Malaysia zongah ZAM makai in, Central ZOMUSte mah tawh October 16, 2023 ni-in Khuado Pawi- 2023 thupitak bawl uh a, mipi 3000-4000 kim kihelthei ding cih thute kiza hi. Athupi mahmah khatah Khuado Pawi hun sungah nidang a kizangzel Anzuakna nei nawnlo uh ahih manin, zukham ankham akitawng kibuan omlo pah cih kiza hi.
Tua banah Zomite’ tamna pen USA gam zongah State tuamtuam ah thupi leh nopci theithei in kibawl ziahziah ci hi. Europe sungah Zomi Innkuan Norway makaihna tawh October 14-15, 2023 ninih sung Norway gam laizang pawl Oppdal khuapi ah thupitak kibawl thei cih kiza hi.
Tua mah bangin, UK (England) zongah ZIUK makaihna tawh kibawl cih kiza a, India gam Delhi khuapi a om gambel Zomite leh Mizoram mun pawl khat zongah kibawl cih zong kizasawn hi. Thu kician akingah lian loh hangin, gamdang mun pawl khat ahi S. Korea, Japan, Canada, etc.. cihte zongah kibawl kawikawi cih kiza hi.
Hih bangin Kawlgam buaina leh lungkhamna tampi kawmkal ah Zongeina Khuado Pawi akibawltheih kiknate leh gam le nam ading thungetkhopna hunin I zattheih ciat manin ii Topa minthanna hi hen la, ii gam ii lei cidamna, kithutuahna leh khantohna a omna ding hi hen ci-in, Tongsan Media pan ii pulak hi.
![](https://tongsan.org/wp-content/uploads/2023/10/382591012_624132616539878_7459895461576295814_n-1-1024x576.jpg)
![](https://tongsan.org/wp-content/uploads/2023/10/391675677_709361931235822_4595983339425612339_n-1024x683.jpg)
![](https://tongsan.org/wp-content/uploads/2023/10/392917029_615263960798568_2837175457240659527_n-1024x683.jpg)
![](https://tongsan.org/wp-content/uploads/2023/10/391568305_615263590798605_8152513521747299312_n-1024x683.jpg)
![](https://tongsan.org/wp-content/uploads/2023/10/392925728_615267354131562_2343091165400528319_n-1024x683.jpg)
![](https://tongsan.org/wp-content/uploads/2023/10/395483970_6363212633807263_2946354730805767346_n-1-1024x611.jpg)
![](https://tongsan.org/wp-content/uploads/2023/10/309276892_3239793466237628_7824925994755107362_n-1024x683.jpg)
![](https://tongsan.org/wp-content/uploads/2023/10/395623979_576586974592820_1170149004501796926_n-1024x768.jpg)
Hits: 12