Myanmar gam leh Thailand gamgi a om Maesot khuapi-ah October 23 ni-in Maesot Zomi Fellowship vaihawmna tawh Zo ngeina Khuado Pawi-2023 thupitak kibawl cih thu pawipi vaihawm makaite in Tongsan Media tanute zasak hi. Hih Maesot Zo ngeina Khuado pawi pen Thailand gam (adiakdiak Maesot) ah gambel / galtai a om Zomite’ ading a (1) veina hi in, akihelkha khempeuh in nuamsa leh thangah thei mahmah uh cih thu abeisa 2007 kum gam buaina hangin Maesot khuapi a tung masa lim suaih lamah sia asem Sia John Khai in Tongsan Media tungah zasak hi.
“Ngeina pawi i bawl theih lungdam mahmah ing! Kei ading hih bang pawi tawh ka kigamlat zawh sawt mahmah ta a, thangah leh lungkim mahmah ing”ci-in Sia John Khai in gen hi. Khuado pawipi sungah kimawlna tuamtuam le thu genna, la sakna, Zo ngeina laam tuamtuam ki kinei-in, akihel mimal vekpi 70 val bang pha thei ci hi. Vok tuk 5 val khat Khuado sa in kigo in, Kimawl hun sungin tualpi-ah nai 2 sung kimawlna tuamtuam tawh gualnop hun kinei hi.
Zomi khangno khat in, “Zo ngeina la sakna, lamnate picing tak ii neih zawh nai loh hangin, adiakdiak ko, khangthakte’ ading tutung Khuado pen nuamsa in tha ngah mahmah ung! Mai lamah i hanciam semsem ding lunggulh ing” ci-in pawi vaihawm Khangno khat in a thangahna gen hi. Annek tuidawn lam tawh kisai Zo huan ngiatin kihuan /kibawl in, Vok sa ne lote ading Aksa lim mahmah kibawl ci hi. Thailand gam Maesot khuapi-ah innkuan pawlkhat a om zawh a sawt hangin, a tamzaw pen 2021 Kawlgam buaina hangin a tungthak mi tam zaw a, pawlkhat CDM lut zong tampi om uh cih thu Khuado sungah akihel makai khatin Tongsan Media tanute’ tungah gen hi.
Hits: 6