August 12, 2023 || Tongsan Media Group ||
Chin State, Falam township a om Ukna buluh (SAC), te gal phualpi ahi Khah Lah Zah (268) battalion headquarters pen tuni August 12, 2023 zingsang tung (01:00am) in Chin galkap belpawl (Chin Alliance) te’n galvan koihna phualpi buluh uh a, SAC galkapte 6 si-in, Set thaupi (Machine gun) akipan Thaupi leh thauneu lawng 10 val leh thautang tampi ngah khia uh cih CNF /CNA) pan thugenpi Salai Thet Nyi in pulak khia hi.
” Zingsang khuavak ma (01: 00am) hunin SAC Kha-Lah-Zah (268) Falam Camp pen ka buluh uh a, tua laiah Gate 2 dong kantan in ka lut khit uh teh amau galvan koihna mun sung tektek dong kilut hi. Tua lai mun pan galvan 10 val (om khempeuh) kingahkhia hi” ci-in Salai Hteet Nyi in gen hi. Hih SAC te’ Camp omzia pen etcianna akineih khit tuni August 12, ni zingsang tungin kibuluhzo suak a, nai 2 sung nasiatak kikapna om ci-in genbeh hi.
“Ko, lam pan CDF-KKG te galkap khat si in, amau (SAC) lamte galkap 6 si uh a, 9 liam uh cih a nunung pen thuzakna nei ung. Sun lam 11:00am kim ciangin ko pawl omna hi ding a upmawhna mun teng Jet fighter zangin Thaupi tawh kap uh hi. Tua a kapna ah mipi 3 kim si in, 6 kimin liamna ngah uh “ ci-in Salai Htet Nyi in gen hi.
Ukna buluh (SAC)te’ galhiam koihna phualpi pan a ngah khiat uh galvante sung pan Machine gun lawng 1, Carp tail machine gun lawng 1, Thaupi 60 MM te lawng 3, RPG lawng 2, Thauneu lawng 4, a vekpi gawm mal 11 leh point fight (machin gun) tangte leh thauneu tang honpi ngah khia uh hi. battalion headquarters sung omzia tawh kisai Salai Hteet Nyi in gencianna nei hi.
“Gate masa pen kiluh masa pah hi. Gate nihna zong kiluhsuak pah hi. Tua munah SAC ten hong kap uh hi. Hun tomno sung ahih hangin nai 2 sung sawt ziau hi” ci-in genbeh hi. Galhiam koihna phual kiluh in, galvante kilakhia thei pah hi. Kikapna mun tawh kigamla mahmah a om Falam khuapi kiang Ramtlo khuaneu ah sun 11:00am kim pawlin SAC ten galvanleng tawh bomb khiat uh a, khuami pawl khat liam uh hi.
Tukum abeisa April kha sungin zong Falam township Var gunlei kiang a om SAC galphual pen CNDF ten va buluh uh a, tua mun a om Palikte leh galkap hon khat si-in a liam zong tampi om banah pawl khat hingmat uh hi. Galvan honpi khat zong CNDF ten ngah khia lai uh hi. Tua hangin SAC ten Ramtlo khua leh Weibulah khuapite Jet fighter tawh bomb khiat uh a, khuami 9 si-in, tampi mah liam uh hi.
Source: People’s Spring
Translated: Tongsan Admin Team
Hits: 4