October 10, 2023 || Tongsan Media Group ||
Gaza zangkuam ah Hamas ngongtat pawlte tawh gal kido kawmkal ah Lebanon gam lamah Israel te in gal mai thak tuak kha thei ding dinmun ah om hi. Hamas te’n Israel gam leitaw lamah galkap leh galvan a lom atang tawh kiginkholh loh laitak October 7, ni-in Gaza zangkuam ah nasiatak kikapna om hi. Lebanon thau tawi pawl khat ahi Hezbollah te pen Hamas ngongtat pawlte a huh leh a pawlpihte hi in, Israel gamgi nehneh ta uh ahih manin, Israel ten zong gamgi ah galkap nasiatak koihbeh ta uh hi.
October 9, ni-in Lebanon gam kantan in Israel gam sungah a lutsawm den Palestines gamnuai mite 3 thatlum khin ahihna uh Israel ten pulakkhia uh hi. Hih October 9 nitak lam mahin Hezbollah te in Israel gam sung lamah Thaupi (rocket) leh Motar tawh kap gawp mawk uh hi. Hih thu hangin langnih kitelkhialhna ngat semsem ahih manin, Middle East sung tengah Israel – Hamas kinuaina / kisualna galpi a pian khak ding kilauthawng mahmah hi.
Hebollah ten amau pen Israel leilu lam, Galilee kuam a om a galte omna phualpi 2 pen kikapkha lian ci-in tangko uh hi. Hih bangin a kapna pen Israel te’n gal deihna hangin, a nuntakna a piakhia Palestines thau tawi pawl Islamic Jihad te’ galkap 3 te akithahna hangin, Hezbolla ten phula hi ung ci-in pulakkhia uh hi.
Nitak lamin Israel ten Vanleng khahkhia in Lebanon gam leitaw lamah a galphualte pawl khat Rocket tawh kapkha lian banah Thaupi zong tawh kap uh hi. Islamic Jihad pawlin galkap honpi tawh gamgi kantan in a do uh hangin, Israel galkapte 1 si-in, 6 liam cih thu Israel gal lam vaisaiten gen uh hi.
Tua banah Israel leh Hizbolla te kido / kikapna kikaptuahna nei uh hi. Hizbolla i cihte pen Israel te’ a galpi uh ahi Irante’ Revolution Guard Corps khatin abeisa 1982 kum a kiphutkhia Thau tawi kipawlna khat ahi hi. Tua hun lai-in Israel in Lebanon tawh akikapkhit zawh Iran in amau gam sungah Hizboola pawlte pen Thau tawi kipawlna khatin apattah uh ahi hi.
2006 kumin Israel leh Hizbolla te nasiatak kikap ngei uh a, ni 34 khitteh khawl uh hi. Langnih galkapte in gamgi tuak uh kikheng / kantan in kikapna / kidona om thithe den hi. Tulaitak Israel te’ dinmun ahih leh Gaza galdona bek mitsuan theih hi nawn loin, Lebanon lam zong mit khuplo / ihmu loin a etcik mahmah uh kul ta hi. Gaza pen Israel gam nitumna ii leitaw lamah om a, Lebanon pen Israel gam leilu tam tawh kigamgi in om hi.
Source: People’s Spring
Translated: Tongsan Admin Team
Hits: 6