October 11, 2023 || Tongsan Media Group ||
Gaza region ah Israel te’n vanlam tawh tawlnga loin, a kapkap kawm mahin Israel leh Lebanon gamgi ah Thaupi leh Rocket ginngte a ni 3 na tuni October 11 (Wednesday) ni dong ging ziahziah lai hi. Lebanon leitaw lam panin Israel gam sung lamah Rocket tang tampi tawh nasiatak kikap in, Lebanon gamgi kim mun 3 khawng pan Thaupi meithal san zialzialte leh thauvui khute meikai bangin kizialcip kimu hi. Tua kikapnate pen Palestine ngongtat pawlte’ nasepna hi ci-in Security lam thuthak saite’n Reuter te tungah zasak uh hi.
Thubul zakna dang khat panin Israel te’ lot Thaupite pen Lebanon gam leitaw lam Rocket tawh akapna munte kapkha lian uh ci hi. Israel galkapte’ lamah ahih leh Lebanon gam sung pan Rocket tawh akikapna mun teng Thaupi tawh thukin kapkik uh ci-in gen uh hi.
Lebanon lam pan missiles tang 15 lawn khia uh a, tua sung pan Israel te’n tang 4 kapkhia man uh a, adang tang 10 kimte lozau / gamlak ah kia ci hi. Abeisa Oct. 9 (Monday) in zong Lebanon gamgi dung akibuaisan mahmah lai-in, Hezbolla ngongtat pawlte mi 3, Israel galkap officer 1 leh Lebanon gam sung panin Israel gam sungh a lut sim Palestine ngongtat mi 2 si uh hi.
Translated & Posted: Tongsan Admin Team
Hits: 6